სომხეთში ევროკავშირის სადამკვირვებლო მისიის შტაბ-ბინის გახსნის ცერემონია ეღეგნაძორში გაიმართა.

„არმენპრესის“ ინფორმაციით, გახსნის ცერემონიაზე სომხეთისა და ევროკავშირის ჰიმნები შესრულდა, შემდეგ კი შტაბ-ბინის გახსნა სომხეთში ევროკავშირის სადამკვირვებლო მისიის ხელმძღვანელმა მარკუს რიტერმა გამოაცხადა.

თავის გამოსვლაში მარკუს რიტერმა აღნიშნა, რომ მათმა საქმიანობამ სასაზღვრო რეგიონებში ხელი შეუწყო დაძაბულობის შემცირებას და ადგილობრივ მოსახლეობაში უსაფრთხოების განცდის გაზრდას. „ჩვენ მთელი ევროკავშირისა და საერთაშორისო საზოგადოების ყურადღებას ვაქცევთ ამ კონფლიქტზე და ჩვენი მოხსენებებით წვლილი შეგვაქვს ევროკავშირის დახმარებით სომხეთსა და აზერბაიჯანს შორის ურთიერთობების მოწესრიგების პროცესში. ვფიქრობ, ყველა ვთანხმდებით, რომ ეს რეგიონი იმსახურებს გრძელვადიან მშვიდობასა და სტაბილურობას და ვიმედოვნებ, რომ ერთად შევძლებთ ამ მიზნის განხორციელებაში წვლილის შეტანას“,- განაცხადა სომხეთში ევროკავშირის სადამკვირვებლო მისიის ხელმძღვანელმა.