Փրկարարները մարել են Կապանի տներից մեկում բռնկված հրդեհը. տուժածներ չկան
10:45, 16 Հոկտեմբեր 2019
ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ: «911» ծառայություն հոկտեմբերի 16-ին, ժամը 08:16-ին ահազանգ է ստացվել, որ Սյունիքի մարզի Կապան քաղաքի Գրիգոր Արզումանյան փողոցի տներից մեկում հրդեհ է բռնկվել:
Ինչպես «Արմենպրես»-ին հայտնեցին ՀՀ ԱԻՆ տեղեկատվության և հասարակայնության հետ կապերի վարչությունից, դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:
Պարզվել է, որ հրդեհը բռնկվել է Գրիգոր Արզումանյան փողոցի 2-րդ նրբանցքի տներից մեկի խոհանոցում:
Հրդեհը մեկուսացվել է ժամը 08:55-ին, մարվել՝ 09:00-ին:
Այրվել են տան խոհանոցն ու խորդանոցը` գույքով (մոտ 20 քմ): Հրդեհի հետևանքով տուժածներ չկան:
Բաժանորդագրվեք մեր ալիքին Telegram-ում