Ամրակից գյուղի մոտ կայանված բեռնատարին բախված ավտոմեքենայի վարորդը հոսպիտալացվել է
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարության «911» ծառայությունը սեպտեմբերի 22-ին, ժամը 10:46-ին ահազանգ է ստացել, որ Ստեփանավան-Վանաձոր ավտոճանապարհին՝ Լոռու մարզի Ամրակից գյուղի մոտակայքում, տեղի է ունեցել ՃՏՊ, քաղաքացին արգելափակվել է ավտոմեքենայում. անհրաժեշտ է փրկարարների օգնությունը:
Դեպքի վայր է մեկնել ԱԻՆ փրկարար ծառայության մարզային փրկարարական վարչության հրշեջ-փրկարարական ջոկատից մեկ մարտական հաշվարկ:
Ինչպես «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, պարզվել է, որ Ստեփանավան-Վանաձոր ավտոճանապարհի 3-րդ կմ-ին «Volkswagen Polo» (վարորդ՝ Նիկոլայ Ա., ծնված՝ 1987թ.) մակնիշի ավտոմեքենան դուրս է եկել ավտոճանապարհի երթևեկելի հատվածից և բախվել ճամփեզրին կայանված «ԶԻԼ-130» (վարորդ՝ Արմեն Շ. ծնված 1971թ.) մակնիշի բեռնատար ավտոմեքենայի կցորդիչին:
Մինչ փրկարարների՝ կանչի վայր հասնելը Նիկոլայ Ա.-ն տեղի ուժերով դուրս է բերվել ավտոմեքենայից և հոսպիտալացվել Ստեփանավանի բժշկական կենտրոն:
Փրկարարները հոսանքազրկել են «Volkswagen Polo» մակնիշի ավտոմեքենան և փակել գազի բալոնի փականը:
Բաժանորդագրվեք մեր ալիքին Telegram-ում