ԳԱՎԱՌ, 19 ՍԵՊՏԵՄԲԵՐԻ, ԱՐՄԵՆՊՐԵՍ : Գավառի ուսուցողական կենտրոնում նոր ուսումնական տարին մեկնարկել է շենքային բարվոք պայմաններում:

Ինչպես «Արմենպրես»-ին տեղեկացրին Գավառի քաղաքապետարանի աշխատակազմից,  ուսուցողական կենտրոնի շենքային պայմանների բարելավման համար տեղական բյուջեից հատկացվել է ինը միլիոն դրամ: Գավառ համայնքի բյուջեի միջոցներով այստեղ կատարվել են վերանորոգման աշխատանքներ: Շինարարական աշխատանքները սկսվել ու ավարտվել են վերջին մեկուկես ամսում: Կատարվել են շենքի ներքին եւ արտաքին հարդարման աշխատանքներ:

«Նորոգվել են 8 դասասենյակ, 8 լսարան եւ միջանցքը, դրսի պատերը: Նոր ուսումնական տարում վերանորոգված շենքը լավ նվեր էր մանկավարժական անձնակազմի եւ կենտրոն հաճախող 120 սաների համար: Նախկինում քաղաքապետարանի միջոցներով ամբողջությամբ նորոգվել էր շենքի հատակը, ձեռք էր բերվել նոր գույք, իսկ այս տարի մենք ունեցանք բարեկարգված շենքային պայմաններ, որոնք  կնպաստեն ուսումնական գործընթացն առավել արդյունավետ կազմակերպելուն: Կենտրոնում գործում են հելունագործության, հագուստի մոդելավորման եւ դիզայնի, երգեցողության, դաշնամուրի, նկարչության եւ անգլերեն լեզվի խմբակներ, որոնց սաները մեծ հաջողություններ են գրանցում մարզային, հանրապետական և միջազգային տարբեր ստուգատեսներում»,-նշեց Գավառի ուսուցողական կենտրոնի տնօրեն Մարիա Ղասաբօղլյանը:

Խոսրով Խլղաթյան