Գավառ, 22 ՀՈՒԼԻՍԻ, ԱՐՄԵՆՊՐԵՍ : Գեղարքունիքի մարզպետ Գնել Սանոսյանն աշխատանքային այց կատարեց Հայրավանք համայնք, որտեղ այս պահին ընթանում են ֆուտբոլի փոքր խաղադաշտի կառուցման եւ Բարի գալուստ փողոցի հիմնանորոգման աշխատանքները:«Արմենպրես»-ի տեղեկացմամբ՝ ինչպես ներկայացրեց Հայրավանքի գյուղապետ Սասուն Համբարձումյանը, ճանապարհի հիմնանորոգման ծրագրի ընդհանուր արժեքը կազմում է 18,5 միլիոն դրամ, որի 60 տոկոսը հատկացրել է ՀՀ կառավարությունը, 40 տոկոսը՝ Հայրավանքի համայնքապետարանը: Շինարարական աշխատանքները մեկնարկել են հուլիսի 9-ից եւ կավարտվեն այս տարվա սեպտեմբերի կեսերին:

Մարզպետն այցելեց մեկ այլ շինհրապարակ, որտեղ Հայաստանի ֆուտբոլի ֆեդերացիայի հետ համագործակցությամբ ընթանում են ֆուտբոլի փոքր խաղադաշտի կառուցման աշխատանքները: Շինարարների հավաստմամբ՝ խաղադաշտը կշահագործվի առաջիկա երկու ամսում: Այցի ավարտին Գնել Սանոսյանը հայտնեց օրվա այցի եւ մարզում այս պահին ընթացող շինարարական աշխատանքների հետ կապված իր տպավորությունները: 

§Մենք ՀՀ կառավարության հաստատմանն ենք ներկայացրել 102 սուբվենցիոն ծրագիր, որոնցից այս պահին հաստատվել է 98-ը: Դրանց մի մասն արդեն սկսվել ու ավարտվել է, մի մասը մեկնարկային փուլում է, մի մասը՝ մրցութային: Եթե առաջիկայում կառավարությունը հաստատի մնացած մի քանի ծրագրերը, ապա մեր մարզի համայնքների նպատակային ծրագրերի իրականացման համար կատարվող ներդրումներն այս տարի կգերազանցեն 5 միլիարդ դրամի սահմանները: Այդ ծրագրերը հիմնականում կավարտենք այս տարվա ընթացքում, բացառությամբ թվով երեք համայնքներում կառուցվող մանկապարտեզների, որոնց շինարարական աշխատանքները կսկսենք այս տարվա մեջ, բայց ավարտի կհասցնենք եկող տարի»,-հավաստեց մարզպետը:

Խոսրով Խլղաթյան