ԵՐԵՎԱՆ, 17 ՀՈւՆԻՍԻ, ԱՐՄԵՆՊՐԵՍ: Իտալիայի պետական պարտքի չափն ընթացիկ տարվա ապրիլին սահմանել Է հերթական ռեկորդը եւ հասել պատմական առավելագույն ցուցանիշին՝ 1,373 տրիլիոն եվրոյի: Այդ մասին, ինչպես տեղեկացնում Է «Արմենպրես»-ը, հունիսի 17-ին հայտնել Է երկրի կենտրոնական բանկը՝ Bankitalia-ն: Մարտ ամսվա համեմատությամբ Իտալիայի սուվերեն պարտքն աճել Է 14,8 մլրդ եվրոյով:

Դա տեղի Է ունեցել ամենից առաջ կենտրոնական պետական վարչակազմի ծախսերի մեծանալու հաշվին, որոնք ավելացել են 13,9 մլրդ եվրոյով: Սպառողների իրավունքների պաշտպանության Codacons իտալական առաջատար կազմակերպությունն այդ կապակցությամբ հայտնել Է, որ ներկայում երկրի յուրաքանչյուր քաղաքացուն բաժին Է ընկնում ավելի քան 39 հազար եվրո պետական պարտք այն դեպքում, երբ յուրաքանչյուր իտալական ընտանիքին՝ ավելի քան 93 հազար եվրո: «Այդ ամենը տեղի Է ունենում ՀՆԱ-ի նվազման ֆոնին, ընդ որում՝ տարբեր ճյուղերի գծով՝ առեւտրից մինչեւ արդյունաբերություն, տնտեսական ցուցանիշները բացասական միտում են արձանագրում»,-նշվում Է Codacons-ի հաղորդագրության մեջ, հաղորդել Է ՌԻԱ Նովոստին: