ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: «Հայաստանում մեկ առողջության մոտեցմամբ բրուցելոզի հսկողություն»  AM-4 ծրագրի շրջանակներում` հանրապետության բոլոր մարզերում իրականացվել են անասնաբույժների, տեսուչների, համաճարակաբանների և լաբորատոր մասնագետների ուսուցման և գիտելիքների գնահատման աշխատանքներ:

«Արմենպրես»-ի հաղորդմամբ`լրագրողների հետ զրույցում այս մասին ասաց ՀՀ ԿԵ սննդամթերքի անվտանգության տեսչական մարմնի (ՍԱՏՄ) ղեկավար Գեորգի Ավետիսյանը:

«Մշակվել է «2019-2022 թվականներին Հայաստանի Հանրապետությունում բրուցելոզ հիվանդության կանխարգելման և միջոցառումների ծրագիրը հաստատելու մասին» ՀՀ կառավարության որոշման նախագիծը: Այն գտնվում է շրջանառության փուլում»,- նշեց Ավետիսյանը:

Նրա խոսքով` ՀՀ անվտանգության խորհրդի հետ համատեղ մշակվել և շրջանառության փուլում է գտնվում  նաև «Հայաստանի Հանրապետությունում խոշոր և մանր եղջերավոր կենդանիների բրուցելոզ հիվանդության դեմ պայքարի և կանխարգելման ռազմավարություն և դրանից բխող միջոցառումների ծրագիր մշակելու նպատակով աշխատանքային խումբ ստեղծելու, դրա կազմը և գործունեության կարգը հաստատելու վերաբերյալ» վարչապետի որոշման նախագիծը: