ՀՀ բնապահպանության նախարարը և Բուլղարիայի դեսպանը նախանշել են ոլորտում համագործակցության ներուժի իրացման քայլերը
ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: ՀՀ բնապահպանության նախարար Էրիկ Գրիգորյանը հանդիպել է Հայաստանում Բուլղարիայի Հանրապետության արտակարգ և լիազոր դեսպան Ցոցորկովա-Կայմակտչիևա Մարիա Պավլովային։
Կողմերը կարևորել են բնապահպանության ոլորտում համագործակցության խորացումը և նախանշել այդ ուղղությամբ երկրների միջև առկա ներուժի արդյունավետ իրացման քայլերը։ Քննարկվել են նաև բնության հատուկ պահպանվող տարածքների, ջրային ռեսուրսների կառավարման ոլորտներում փորձի փոխանակման հարցերը։
Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից, նախարար Էրիկ Գրիգորյանը դեսպանին տեղեկացրել է, որ բնապահպանության նախարարությունն իրականացնում է բնապահպանական վճարների քաղաքականության արմատական փոփոխություն, որի հիմքում դրվել է շրջակա միջավայրի աղտոտման կանխարգելման սկզբունքը, և այդ առումով օգտակար է համարել Բուլղարիայի արդեն կիրառած փորձի դիտարկումը։
Որպես ԵՄ անդամ պետության ներկայացուցիչ՝ դեսպանի հետ քննարկվել են նաև ՀՀ-ԵՄ ընդլայնված և համապարփակ համաձայնագրի շրջանակներում բնապահպանության ոլորտին առնչվող հրահանգների մոտարկման գործողությունների ընթացքին վերաբերող հարցեր։
Բաժանորդագրվեք մեր ալիքին Telegram-ում