Ժամանակը Երևանում՝ 11:07:36,   22 Փետրվար

Սեւանի համայնքապետարանում տեղի ունեցավ հողմաէլեկտրակայանի կառուցման նպատակով հրավիրված հանրային լսում


ԳԱՎԱՌ, 23 ՀՈՒՆՎԱՐԻ, ԱՐՄԵՆՊՐԵՍ: Սեւանի համայնքապետարանում հրավիրված հանրային քննարկումը նվիրված էր «Արմեն Վինդ Ուան» ՓԲ ընկերությունը կողմից Գեղարքունիքի մարզի հյուսիսարեւմտյան մասում հողմաէլեկտրակայանի կառուցման նախագծին, որն իրականացվելու է «Հայաստան. Քամի մեկ» ծրագրի շրջանակներում:

Ինչպես «Արմենպրես»-ին տեղեկացրեց Սեւանի քաղաքապետարանի աշխատակազմի քարտուղար Արմինե Ղուկասյանը, հանրային լսմանը մասնակցում էին 3 ազդակիր համայնքների` Սեւանի, Դդմաշենի եւ Զովաբերի ներկայացուցիչները: Հանրային լսումը հրավիրել էր «Ի Էյ Էներջի Ը դվայզորի» ընկերությունը, որն անկախ հայկական խորհրդատվական ընկերություն է եւ ներդրումային ծրագրերի շրջանակներում տրամադրում է տեխնիկական եւ տնտեսագիտական խորհրդատվություն:

Ընկերության ներկայացուցիչ Վռամ Թեւոսյանը հանրային լսման մասնակիցներին ներկայացրեց հողմաէլեկտրակայանի կառուցման հետ կապված մի շարք հարցեր, մասնավորապես` շրջակա միջավայրի վրա ունեցած ազդեցությունը: Ըստ բանախոսի՝ 2003 թվականին մշակվել են Հայաստանի հողմաէներգետիկ պաշարների քարտեզները, որոնց համաձայն՝ տնտեսապես շահավետ հողմաէլեկտրակայանների ընդհանուր հզորությունը գնահատվում է մոտ 450 ՄՎտ եւ 1.26 մլրդ. կվտժ էլէներգիայի տարեկան արտադրանքով: Առանձնացվել են հիմնական հեռանկարային տեղանքները` Սոթքի լեռնանցք, Բազումի լեռներ՝ Քարախաչի եւ Պուշկինի լեռնանցքներ, Ջաջուռի լեռնանցք, Գեղամա լեռների շրջանը, Սեւանի լեռնանցքը, Ապարանի շրջանը, Սիսիանի եւ Գորիսի միջեւ գտնվող բարձունքային գոտին եւ Մեղրիի տարածաշրջանը:

Ուսումնասիրելով վերը նշված տեղեկատվությունը, ինչպես նաեւ հաշվի առնելով ՀՀ կառավարության կողմից վերականգնվող էներգետիկային ցուցաբերվող աջակցությունը` «Աքսես Փաուեր» ընկերությունը նախատեսում է Սեւան քաղաքի մերձակայքում կառուցել եւ շահագործել հողմաէլեկտրակայան: Արտադրված էլեկտրական էներգիան ցանցին միացնելու համար նախատեսվում են կառուցել 220 ԿՎ օդային գծեր: Հողմաէլեկտրակայանի տուրբինների տեղադրումը նախատեսվում է իրականացնել Սեւանի թերակղզուն մոտ ափից դեպի հյուսիս- արեւմուտք: Հեռավորությունը 1.54 կմ-ից մինչեւ 21 կմ, միջին բարձրությունը` ծ.մ. 2300 մ: Մոտակա տուրբինը Սեւան քաղաքից կլինի 2.76 կմ, Ծովագյուղից՝ 4.47 կմ, Սեւանավանքից՝ 5.66 կմ, Հրազդան քաղաքից՝ 7.12 կմ հեռավորության վրա: Հողմաէլեկտրակայանի համար հայցվող տարածքները գտնվում են Սեւան, Դդմաշեն, Ծաղկունք, Գեղամավան, Ծովագյուղ, Սեմյոնովկա համայնքների վարչական տարածքներում:

«Հողմաէլեկտրակայանի եւ օդային գծերի համար նախատեսվող հողերը գյուղատնտեսական են և արոտավայրեր: Դրանց մեծ մասը համայնքային հողեր են, սակայն օդային գծերի դեպքում հնարավոր է, որ որոշ հատվածներ անցնեն սեփականաշնորհված հողերով: Օդային գծերի ջրագծի տուրբինների հիմքերի ստույգ կոորդինատները կհստակեցվեն աշխատանքային նախագծման շրջանակներում, այդ թվում նաեւ նախատեսվող հողերի կարգավիճակը:

Հողմաէներգետիկան համարվում է բնապահպանական տեսակետից էլեկտրական էներգիայի արտադրության առավել նպաստավոր ուղղություններից: Այն թույլ է տալիս նվազեցնել հանածո վառելիքի օգտագործումը, մթնոլորտային օդի եւ ջրային ռեսուրսների աղտոտումը, տրանսպորտային տեղափոխումները: Ներկայացվող գործունեության իրականացման ժամանակ բնապահպանական ռիսկերը կապված են հողմակայանի շինարարության եւ շահագործման հետ:Նախատեսված է նաեւ բնապահպանական եւ սոցիալական միջոցառումների ծրագիր: Քննարկումներ եւ խորհրդատվություն կանցկացվեն բոլոր ՀԿ-ների հետ, որոնք թռչունների պահպանման հարցում ակտիվ մասնակցություն ունեն: Չնայած զգայուն ընկալիչները բավականին մեծ հեռավորության վրա են գտնվում տուրբինների համար նախատեսվող տարածքից, այնուամենայնիվ, աղմուկի մակարդակը համապատասխան ստանդարտներում պահելու համար կիրականացվի աղմուկի մոնիթորինգ եւ համակարգչային մոդելավորում»-մանրամասնեց բանախոսը:

«Հանդիպման մասնակիցները կիսեցին իրենց մտահոգությունները, տվեցին մի շարք հարցեր, կատարեցին դիտարկումներ, որոնք հանրային 2-րդ լսման ժամանակ հաշվի են առնվելու: Ամբողջության մեջ հողմաէլեկտրակայանի կառուցումը տարածաշրջանի համար ունի կարեւորագույն նշանակություն եւ համայնքների տնտեսության զարգացման վրա ունենալու է դրական ազդեցություն»,-նշեց Արմինե Ղուկասյանը:

Խոսրով Խլղաթյան




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ