Էրեբունու թիվ 3 մանկապատանեկան ստեղծագործական կենտրոնը հիմնանորոգումից հետո բացեց դռները
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Երևանի քաղաքապետարանի և ՄԱԿ-ի Զարգացման ծրագրի (ՄԱԶԾ) «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի համագործակցությամբ հիմնանորոգված՝ Երևանի Էրեբունի վարչական շրջանի թիվ 3 մանկապատանեկան ստեղծագործական կենտրոնը պաշտոնապես բացեց դռները: «Արմենպրես»-ի հաղորդմամբ՝ բացման արարողությանը ներկա էին Երևանի քաղաքապետ Հայկ Մարությանը, ՀՀ բնապահպանության նախարարի պաշտոնակատար Էրիկ Գրիգորյանը, Հայաստանում ՄԱԿ-ի մշտական համակարգող Շոմբի Շարփը, Հայաստանում ՄԱԶԾ մշտական ներկայացուցիչ Դմիտրի Մարիյասինը:
Երևանի քաղաքապետ Հայկ Մարությանը բացման խոսքում կարևորեց երեխաների մեջ երաժշտական ճաշակի սերմանումն ու փոքր տարիքից նրանց մեջ առողջ ապրելակերպի գաղափարն արմատավորելը: «Սա մեր առաջնահերթություններից է: Ես ուրախ եմ ազդարարել, որ այսուհետ Էրեբունի վարչական շրջանի և այլ վարչական շրջաններում բնակվող մեր երեխաները կարող են կրթվել, զարգացնել իրենց երաժշտական ճաշակը, գիտելիքներն ու հմտությունները այս գեղեցիկ և ժամանակակից կենտրոնում»,- ասաց նա:
ՀՀ բնապահպանության նախարարի պաշտոնակատար Էրիկ Գրիգորյանն էլ հույս հայտնեց, որ Հայաստանի այլ շրջաններում բնակվող երեխաները նույնպես հնարավորություն կունենան այսպիսի պայմաններում աշխատել և սովորել:
Հյուրերը շրջեցին հիմնանորոգված կենտրոնով, ծանոթացան պայմաններին:
Բաժանորդագրվեք մեր ալիքին Telegram-ում