Հյուսիսային Կորեայում գաղտնի հրթիռային զինափորձարաններ են գտել
ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ: Հյուսիսային Կորեայում հայտնաբերել են 13 գաղտնի հրթիռային բազաներ: Այդ մասին, ինչպես հայտնել Է Reuters-ը, ասված Է Վաշինգտոնի Ռազմավարական եւ միջազգային հետազոտությունների կենտրոնի զեկույցում, տեղեկացնում Է «Արմենպրես»-ը:
Ինչպես ենթադրվում Է, ընդամենը երկրում գործում Է շուրջ 20 գաղտնի ռազմակայան: Կենտրոնի փորձագետ Ջոզեֆ Բերմուդեսի խոսքով՝ չնայած ԱՄՆ-ի հետ վարվող բանակցություններին, ԿԺԴՀ-ի իշխանություններն օբյեկտները պահում են աշխատանքային վիճակում: Դրանցում նաեւ անցկացվում են ենթակառուցվածքի բարելավման ոչ մեծ աշխատանքներ:
Բազաները տեղաբաշխված են հեռավոր լեռնային շրջաններում, ասված Է փաստաթղթում: Դրանցում կարող են գտնվել տարբեր հեռահարության բալիստիկ հրթիռներ: Դրանցից ամենախոշորը, ինչպես ենթադրվում Է, կարող Է հասնել ԱՄՆ-ի տարածք: Ինչպես նշում Է Բերմուդեսը, օբյեկտներում չկան արձակման կայանքներ: «Միեւնույն ժամանակ հրթիռները կարող են ռազմակայանից արձակվել արտակարգ դրության դեպքում»,-գրում Է նա:
Մասնավորապես, Սաքքանմոլի բազան, որը գտնվում Է հարավկորեական սահմանից ոչ հեռու, աշխատունակ վիճակում Է: Նոյեմբերի 12-ին The New York Times թերթը հրապարակել Է արբանյակից արված լուսանկար, որտեղ, ենթադրաբար, պատկերված Է Սաքքանմոլը: Ինչպես գրում Է հրատարակությունը, ամերիկյան հետախուզությունը 16 գաղտնի օբյեկտներ Է հայտնաբերել ԿԺԴՀ-ի տարածքում:
Փհենյանն ավելի վաղ պաշտոնապես չի հայտարարել գտնված ռազմակայանների գոյության մասին, նշում Է Reuters-ը: Մինչդեռ, վերլուծաբանների խոսքով՝ միջուկային բոլոր օբյեկտների հաշվառումը միջուկազերծման ծրագրի կարեւոր մասն Է:
Բաժանորդագրվեք մեր ալիքին Telegram-ում