ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Ամերիկացի երգչուհի Ռիհաննան քննադատաբար Է արտահայտվել ԱՄՆ-ի նախագահ Դոնալդ Թրամփի կողմնակիցների հանրահավաքների կապակցությամբ՝ դրանցից մեկում իր երգի օգտագործման պատճառով, տեղեկացնում Է «Արմենպրես»-ը:

«Ո՛չ ես, ո՛չ իմ մարդիկ այլեւս չենք հայտնվի նմանօրինակ ողբերգական հանրահավաքներում կամ նրա կողքին»,- հայտարարել Է երգչուհին Twitter-ում: Ռիհաննայի ուշադրությունը Թենեսիի նահանգում քաղաքական միջոցառման ժամանակ նրա Don՚t Stop the Music» երգի օգտագործման վրա հրավիրել Է լրագրող Ֆիլիպ Ռաքերը, որն աշխատում Է Washington Post հրատարակությունում, ինչպես նաեւ համագործակցում Է MSNBC եւ NBC հեռուստաալիքների հետ:

Թրամփն ԱՄՆ-ում միջանկյալ ընտրությունների նախաշեմին մի քանի նահանգներում հանրահավաքներ Է անցկացնում ի պաշտպանություն հանրապետական թեկնածուների: ԱՄՆ-ի Կոնգրեսի ընտրությունները տեղի են ունենալու նոյեմբերի 6-ին: Դրանք միջանկյալ են կոչվում, քանի որ անցկացվում են գործող նախագահի պաշտոնավարման ժամկետի կեսին: Վերընտրվելու են Ներկայացուցիչների պալատի բոլոր 435 պատգամավորները, 100 սենատորներից 35-ը, ինչպես նաեւ 39 նահանգների ու տարածքների նահանգապետները, հաղորդել Է ՌԻԱ Նովոստին: