Ժամանակակից երաժշտական խմբերը երգի միջոցով սեր խոստովանեցին Երևանին
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Երևանի հիմնադրման 2800-ամյակին նվիրված միջոցառումների շարքում առանձնացավ հայկական ժամանակակից երաժշտական խմբերի մասնակցությամբ համերգային ծրագիրը: Այն ներկաներին զարմացրեց ընդգրկված ստեղծագործությունների բազմազանությամբ:
«Արմենպրես»-ի հաղորդմամբ` համերգային ծրագիրն անցկացվեց Հյուսիսային պողոտայում: Ելույթներ ունեցան «The band»-ը, «ԹմբաԹա» երիտասարդական ժողովրդական ռոք-խումբը, «Հայ մյուզիք բենդ» վոկալ անսամբլը և հայկական ժողովրդական երաժշտություն ներկայացնող «Գողթ» խումբը:
«Հայ մյուզիք բենդ»-ի գեղարվեստական ղեկավար, կոմպոզիտոր, դիրիժոր Վահե Հայրապետյանը մեզ հետ զրույցում շեշտեց, որ խմբի կատարումները բացառապես ակապելա են: Հայրապետյանի խոսքով` խմբի անդամներն ունեն Աստծու կողմից տրված տաղանդ, և դա օգտագործում են և’ երգելու, և’ ձայնի միջոցով երաժշտություն ստեղծելու համար: «Ներկայացվելու է վեց հայտնի ստեղծագործություն: Խմբի ելույթը կեզրափակվի երևանյան պոպուրիով, որում ընդգրկված են մայրաքաղաքին նվիրված ամենասիրած երգերը»,- ասաց գեղարվեստական ղեկավարը:
Նա սեր խոստովանեց Երևանին` արև, ջերմություն, խաղաղություն, լիություն մաղթելով քաղաքին:
Համերգային ծրագրին հետևող քսանամյա Լարիսան ասաց, որ իրեն դուր է գալիս, երբ երիտասարդներն են ժողովրդական երաժշտություն մատուցում` ռոքային կամ այլ ժանրեր միախառնելով դրան: «Ուրախ եմ, որ այս տարի նույնպես քաղաքը ջերմ է, երևանցիները երջանիկ են ու լուսավոր»,- նշեց նա:
«The Beautified Project» խմբի նախկին անդամ, դաշնակահար Առլեն Շահվերդյանը, որն ընտանիքի անդամների հետ մասնակցում էր Երևանի կենտրոնում իրականացվող միջոցառումներին` ընդգծեց, որ Երևանն իր տունն է: «Այն քաղաք է, որտեղ ապրում եմ ընտանիքիս հետ և ամեն օր փորձում գեղեցկացնել Երևանը»,- ասաց երաժիշտը:
«Էրեբունի-Երևան» տոնն առաջին անգամ նշվել է 1968 թվականին՝ Էրեբունի ամրոցի հիմնադրման 2750-ամյակի առթիվ: «Էրեբունի-Երևան» տոնը կոչվում է նաև «Երևանի տոն», «Երևանի օր»: «Էրեբունի-Երևան» տոնակատարության համար 1968 թվականին հատուկ գրվել է «Էրեբունի-Երևան» երգը (խոսքը՝ Պարույր Սևակի, երաժշտությունը՝ Էդգար Հովհաննիսյանի), որը հետագայում դարձել է քաղաքի օրհներգը: Այդ երգն առաջին անգամ կատարվել է 2750 հոգուց բաղկացած երգչախմբով` Թաթուլ Ալթունյանի ղեկավարությամբ: Առաջին տոնակատարության ժամանակ Հանրապետության հրապարակի մերձակա զբոսայգում բացվել է նաև 2750 ցայտաղբյուրներից բաղկացած շատրվանների համալիրը:
Բաժանորդագրվեք մեր ալիքին Telegram-ում