ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ազգային անվտանգության ծառայության  պատմության թանգարանում  սեպտեմբերի 24-ին շրջանառության մեջ դրվեց նամականիշ` նվիրված «Հայաստանի անվտանգության մարմինների կազմավորման 100-ամյակը» թեմային: Նամականիշի մարումն իրականացրեցին ՀՀ ազգային անվտանգության ծառայության տնօրեն Արթուր Վանեցյանը, Տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը, Հայաստանի անվտանգության համակարգի վետերան, ՀՀ պատերազմի և զինված ուժերի վետերանների խորհրդի նախագահ Պետրոս Պետրոսյանը և Հայաստանի ֆիլատելիստների միության նախագահ Հովիկ Մուսայելյանը:

Հովիկ Մուսայելյան, Պետրոս Պետրոսյան, Արթուր Վանեցյան, Աշոտ Հակոբյան Արթուր Վանեցյան, Պետրոս Պետրոսյան Հովիկ Մուսայելյան, Պետրոս Պետրոսյան, Արթուր Վանեցյան, Աշոտ Հակոբյան Արթուր Վանեցյան Հովիկ Մուսայելյան, Պետրոս Պետրոսյան, Արթուր Վանեցյան, Աշոտ Հակոբյան

Լուսանկարները` Էդուարդ Սեպետչյանի

«Շնորհավորում եմ նամականիշի մարման բոլոր մասնակիցներին: Կարծում եմ, որ այս փոքրիկ նամականիշի առկայությունը ևս մեկ անգամ ընդգծում է Ազգային անվտանգության ծառայության դերն ու նշանակությունը մեր պետության կառուցման գործում»,- «Արմենպրես»-ի հաղորդմամբ` ասաց Տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը:

Լրագրողների հետ զրույցում ՀՀ ազգային անվտանգության ծառայության տնօրեն Արթուր Վանեցյանն ասաց, որ  սա Ազգային անվտանգության մարմիններին նվիրված առաջին նամականիշը չի, նաև եղել են հետախույզների պատկերներով նամականիշներ:

«Կարծում եմ, այս ավանդույթը լինելու է շարունակական, որովհետև շատ կարևոր է, որպեսզի հասարակությունը ծանոթանա Ազգային անվտանգության ծառայության պատմությանը»,-ասաց Վանեցյանը:

Փոստային նամականիշն ունի 170 ՀՀ դրամ անվանական արժեք: Այն տպագրված է Ֆրանսիայի «Cartor» տպագրատանը` 30 000 տպաքանակով: Նամականիշի հեղինակն է «Հայփոստ» ՓԲԸ դիզայներ Դավիթ Դովլաթյանը:

Նամականիշի վրա, ի թիվս այլ կառույցների, ներկայացված է ՀՀ ազգային անվտանգության ծառայության շենքը ուրվագծային եղանակով: Փոստային նամականիշի աջ հատվածում պատկերված է Երկիր մոլորակը և լուսավորող ՀՀ ԱԱԾ զինանշանը` խորհրդանշելով ազգային անվտանգության մարմինների կարևորությունը ողջ աշխարհում: Նամականիշի չափսերն են 40.0 × 30.00 մմ: