Այգավանում բացվեց ազատամարտիկ Գառնիկ Ղուկասյանի կիսանդրին
ԱՐՏԱՇԱՏ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Արարատի մարզի Այգավան համայնքում սեպտեմբերի 20-ին տեղի ունեցավ «Մարտական Խաչ» 2-րդ աստիճանի շքանշանակիր, Արցախյան ազատամարտի հերոս Գառնիկ Ղուկասյանի կիսանդրու բացման արարողությունը: Հերոսի անունը կրող դպրոցի բակում էին Արարատի մարզպետ Գարիկ Սարգսյանը, մարզպետարանի աշխատակիցները, հերոսի զինակից ընկերները, բարեկամներն ու համագյուղացիները:
Մինչ բացման արարողությունը ներկաները ծաղիկներ խոնարհեցին եւ իրենց հարգանքի տուրքը մատուցեցին այգավանցի բոլոր հերոսների շիրմաքարերին:
Կիսանդրու բացման արարողությունը կատարեցին մարզպետ Գարիկ Սարգսյանը եւ ազատամարտիկի եղբայր Աշոտ Ղուկասյանը: Վերջինս իր խոսքում շնորհակալություն հայտնեց կիսանդրու տեղադրման նախաձեռնողին՝ հերոսի մարտական ընկերոջը, ինչպես նաեւ նրանց, ովքեր մշտապես թե՛ հոգեպես, եւ թե՛ ֆիզիկապես այս տարիների ընթացքում իրենց կողքին են եղել:
«Հերոսների սխրանքն անմահացնող կոթողների տեղադրումը կարեւոր է նրանց փառավոր գործը հավերժացնելու համար: Այդ իսկ պատճառով մարզի բոլոր համայնքներում ցանկալի է ունենալ հերոս տղաների անունները հավերժացնող հուշակոթողներ»,- ընդգծեց մարզպետ Սարգսյանը՝ շնորհակալություն հայտնելով հրաշալի գաղափարի հեղինակներին:
Բացման արարողությունից հետո հյուրերը եղան դպրոցում բացված հերոսի անվան անկյունում եւ մասնակցեցին դպրոցի սաների կողմից կազմակերպած՝ Գառնիկ Ղուկասյանին նվիրված ցերեկույթին: Աշակերտները ներկայացրեցին Եղեգնաձորի, Երասխի, Մեղրիի, Ասկերանի, Շուշիի մարտերին մասնակցած հերոսի կյանքի ուղին եւ տարբեր բնագավառներում նրա ունեցած ձեռքբերումները:
Գառնիկ Ղուկասյանը եղել է ՀՀ աթլետիկայի բազմակի չեմպիոն: Արտաշատում շուրջ 20 տարի է անցկացվում է հերոսի անվան հանրապետական հուշամրցաշար, որին ամեն տարի մասնակցում են ավելի քան 200 աթլետներ ՀՀ տարբեր քաղաքներից եւ Արցախից:
Բաժանորդագրվեք մեր ալիքին Telegram-ում