Թուրքիայի գլխավոր ընդդիմադիրը խոստացել է 4 տարում լուծել քրդական հարցը
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) առաջնորդ Քեմալ Քըլըչդարօղլուն խոստացել է 4 տարվա ընթացքում լուծել քրդական հարցը, իսկ չլուծելու դեպքում հեռանալ քաղաքականությունից:
Այս մասին, ինչպես հաղորդում է «Արմենպրես»-ը, հայտնում է թուրքական Diken պարբերականը:
Անդրադառնալով Թուրքական իշխանությունների կողմից իրաքյան Քանդիլում քրդերի դեմ իրականացվող գործողություններին՝ Քըլըչդարօղլուն նրանց մեղադրել է քրդական խնդիրը լուծել չկարողանալու մեջ:
«Եթե չկարողանամ քրդական հարցը 4 տարվա ընթացքում լուծել, ապա կհեռանամ քաղաքականությունից: Դուք 16 տարի իշխանության գլխին եք, կարողացե՞լ եք, արդյոք, լուծել այդ հարցը: Ես կարծում եմ, Քանդիլի գործողությունները կապված են ընտրությունների հետ: Քրդստանի բանվորական կուսակցությունը (PKK) արդեն քանի տարի է Քանդիլում է, ինչո՞ւ չեք գործողություններ իրականացրել»,-դիմելով իշխանություններին՝ ասել է Քըլըչդարօղլուն:
Թուրքիայի նախագահ Ռեջեփ Թայիփ Էրդողանը սպառնացել է Իրաքյան Քանդիլը և Շենգալը նույնպես «արժանացնել» սիրիական Աֆրինի ճակատագրին:
Էրդողանը հայտարարել է, որ թուրքական 20 կործանիչ հարվածներ են հասցրել
Իրաքի հյուսիսում տեղակայված Քրդստանի բանվորական կուսակցության (PKK) դիրքերին:
Նա նշել է, որ Թուրքիայի զինված ուժերը նպատակ ունեն «կործանելու ահաբեկչական ճահիճը» Իրաքի հյուսիսում, ինչպես դա արել են սիրիական Աֆրինում:
Հռչակելով, թե Աֆրինում պայքարում է ահաբեկչական կազմակերպությունների դեմ՝ Թուրքիան իրականում ռազմական գործողություններ էր իրականացնում տեղի քրդական ուժերի դեմ, ինչի արդյունքում փաստացի օկուպացրեց սիրիական Աֆրինի շրջանը:
Բաժանորդագրվեք մեր ալիքին Telegram-ում