Տոլմայի ավանդական և նոր տեսակները կներկայացվեն ամենամյա փառատոնին
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Հայկական տոլմայի տարատեսակները մոռացությունից վեր հանելու, դրա պատմությունը հանրությանը ներկայացնելու, տոլման թրքացումից զերծ պահելու նպատակով մայիսի 20-ին Դվինի միջնաբերդի հնավայրի մոտ գտնվող Հնաբերդի համայնքում տեղի կունենա տոլմայի ամենամյա փառատոնը: Այս մասին մայիսի 16-ին լրագրողների հետ հանդիպմանը խոսեցին փառատոնի կազմակերպիչներն ու աջակիցները:
«Սա այն միջոցառումներից է, որն էապես նպաստում է զբոսաշրջության ոլորտում պետական քաղաքականության մի շարք խնդիրների լուծմանը: Այն է բազմազանեցնել, դիվերսիֆիկացնել հայկական զբոսաշրջային արդյունքը: Այն հրաշալի հնարավորություն է տալիս Երևանից զբոսաշրջությունը դեպի ՀՀ մարզեր և հատկապես գյուղական բնակավայրեր ուղղելու համար: Նպաստում է Հայաստանում տեղական ավանդույթների պահպանմանը, զարգացմանը և համաշխարհային ներքին շուկայում խթանմանը»,-«Արմենպրես»-ի հաղորդմամբ` նշեց ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահի տեղակալ Մեխակ Ապրեսյանը:
Նրա խոսքով` նմանատիպ միջոցառումները հզոր գործիք են դարձել Հայաստանի և հայկական զբոսաշրջային արդյունքի համաշխարհային շուկայում ներկայացնելու համար: Բազմաթիվ լրագրողներ Տոլմայի փառատոնին գալիս են Հայաստան և լուսաբանում այն առանց նախնական պատվերի:
Հայաստանի զբոսաշրջության զարգացման հիմնադրամի գործադիր-տնօրեն Արա Խզմալյանն ասաց, որ տոլմայի, գինու և նման այլ փառատոները լուրջ քաղաքական կշիռ ունեն: «Ցանկանում ենք, որ գործարար միջավայրը շատ ավելի մեծ թափով ընդգրկվի այդ միջոցառումներում, քանի որ դրանց միջոցով մենք լուծում ենք երկրի ճանաչելիության բարձրացման, համայնքների տնտեսական ակտիվացման և այլ խնդիրներ»,-շեշտեց Խզմալյանը:
Նա հավելեց, որ իրենց կոմիտեն պիտի տեսագրի փառատոնի ընթացքը, պիտի ստեղծվի տեսաբազա և նախատեսվում է տարվա կտրվածքով թեմատիկ տեսահոլովակների նկարահանում, որոնք լայն թվային տիրույթով կոմիտեն կտարածի և կընդգրկի գովազդատեղեկատվական քաղաքականության մեջ:
Հայ խոհարարության ավանդույթների զարգացման և պահպանման Հ/Կ նախագահ Սեդրակ Մամուլյանն ընդգծեց, որ միջոցառումն ութերորդ անգամ է իրականացվում, և իրենք կանեն հնարավորը այն ավելի բարձր մակարդակով կյանքի կոչելու համար: Անդրադառնալով տոլմայի պատրաստման տարբեր եղանակներին` Մամուլյանն ասաց, որ խոհանոցը որպես լայն մշակութային տարատեսակ հնագույն երևույթ է, բայց պետք է ժամանակին համընթաց քայլի: «Հնի վրա նորը կառուցելը մեր նպատակն է: Տոլմայի վերականգնված շատ տեսակներ կան. նախկինում խաղողի տերևի մեջ ծեծված մսով և բլղուրով է պատրաստվել տոլման: Այս բաղադրատոմսը պահպանվել է Սյունիքի մարզում, Վանա տարբերակում այն լցոնվում է դդումի ծաղիկների մեջ, Ալաշկերտում տոլման պատրաստվում է կանեփով»,-պատմեց Մամուլյանը:
Փառատոնը բաղկացած է երկու մասից` մրցութային և գեղարվեստական: Առաջին մասին մասնակցում են ՀՀ հայտնի ռեստորանները, անհատ խոհարարները և տարածաշրջանային սննդի կետերը: Երկրորդ մասին մասնակցում են բոլոր ներկաները, քանի որ այն երգ ու պարով ուղեկցվող տոլմայի համտեսման արարողություն է:
Տոլմայի փառատոնն առաջին անգամ անցկացվել է 2011 թվականին: Այն տեղի է ունեցել Սարդարապատի, ապա Մուսա լեռան հերոսամարտի հուշահամալիրներում: 2017 թվականից ի վեր փառատոնն իրականացվում է Դվինի միջնաբերդի հնավայրի մոտ գտնվող Հնաբերդ համայնքում ամեն տարի մայիսի նախավերջին կիրակին:
Բաժանորդագրվեք մեր ալիքին Telegram-ում