ԳՅՈՒՄՐԻ, 7 ԱՊՐԻԼԻ, ԱՐՄԵՆՊՐԵՍ: Գյումրիում ապրիլի 7-ին մեկնակեց «Մշակույթների երկխոսություն» միջազգային գիտաժողովը: Ինչպես տեղեկացնում է «Արմենպրես»-ը, արդեն 12-րդ տարին անցկացվող գիտաժողովը կյանքի է կոչվում «Վերածնունդ» միջազգային մրցույթ-փառատոնի շրջանակներում:

Այս տարի գիտաժողովը նվիրված է Հայաստանի Հանրապետության եւ Մայիսյան հերոսամարտերի 100, Ֆրանկոֆոնիայի միջազգային կազմակերպությանը ՀՀ անդամագրման 10, Սպիտակի երկրաշարժի 30-ամյա տարելիցներին եւ արվեստի «Վերածնունդ» միջազգային մրցույթ փառատոնի տասնամյա հոբելյանին: Երկօրյա գիտաժողովին մասնակցում են Հայաստանի, Ֆրանսիայի, Ռուսաստանի, Ղազախստանի ներկայացուցիչները:

Լիագումար նիստերի ժամանակ բանախոսները կներկայացնեն հիմնականում երաժշտարվեստին առնչվող հարցեր: Գիտաժողովի բացման ժամանակ ողջունելով բոլոր հյուրերին Երևանի Կոմիտասի անվան պետական կոնսերվատորիայի Գյումրու մասնաճյուղի տնօրեն, արվեստագիտության դոկտոր, պրոֆեսոր Կարինե Ավդալյանը հույս հայտնեց, որ այս գիտաժողովը ևս կլինի արդյունավետ և կնպաստի միջմշակութային խնդիրների լուծմանն ու կապերի ամրապնդմանը: Գիտաժողովի առաջին լիագումար նիստին ներկայացվեցին երաժշտագիտության մեթոդաբանության կատարելագործման, միջմշակութային փոխազդեցության դետերմինացիայի ձևերին և գործոններին, Ժանրի գաղափարին առնչվող և այլ հարցեր: Արմենուհի Մխոյան