ԵՐԵՎԱՆ, 23, ՄԱՐՏԻ, ԱՐՄԵՆՊՐԵՍ: Tatron-drama.am կայքի հիմնական նպատակը դասական, արդի դրամատուրգիան և Հայաստանում գործող թատրոնները մեկ ընդհանուր հարթակ բերելն է: Այն բարենպաստ պայմաններ կստեղծի  ազգային թատրոնի և ազգային դրամատուրգիայի փոխհամագործակցության համար: Կայքը տեսական հոդվածների, հրապարակումների միջոցով կներկայացնի ժամանակակից թատերական կյանքի հիմնախնդիրները և հետագա զարգացման միտումները:

Tatron-drama.am-ի ստեղծման մասին մարտի 23-ին լրագրողների հետ հանդիպմանը պատմեցին կայքի հիմնադիր Կարինե Խոդիկյանը և կայքի դիզայներ Նառա Վարդանյանը:

«Կայքի հիմքը «Դրամատուրգիա» ամսագիրն է, որը լույս է տեսնում 2000 թվականից: Այս տարիներին ամսագիրը մեծ շտեմարան է ստեղծել, ուստի մտածեցինք`  ժամանակն է ընդլայնել դրա ճանաչման սահմանները: Անցյալ տարի մամուլի աջակցության նախագծում կար դրամաշնորհային ծրագիր մշակութային ուղղվածություն ունեցող էլեկտրոնային լրատվամիջոցի համար: Գրեցի կայքի ծրագիրը, և այն ընդունվեց: Ուզում եմ, որ  սա դառնա հայ դրամատուրգի տունը»,-«Արմենպրես»-ի հաղորդմամբ` նշեց Խոդիկյանը:

Նրա խոսքով`եթե կարողանան  վիրտուալ աշխարհում ստեղծել մի փոքրիկ տարածք, որտեղ մարդիկ ոչ միայն պիեսներ կփնտրեն բեմադրելու, այլև պարզապես ծանոթանալու, կարդալու նպատակով, ապա իրենց խնդիրը որոշ չափով լուծված է:

Խոդիկյանը հավելեց, որ ծրագրել է նաև վիրտուալ մատենաշար ստեղծել, որտեղ ներկայացվող առաջին հեղինակը կլինի Լևոն Շանթը, հետո` Հակոբ Պարոնյանը: Մատենաշարը լիարժեք և բովանդակալից ներկայացնելու համար Կարինե Խոդիկյանն ու իր թիմը կհամագործակցեն Հնագիտության և ազգագրության ինստիտուտի հետ:

Կայքի դիզայներ Նառա Վարդանյանն ասաց, որ կայքը ստեղծելիս փորձել են հնարավորինս մատչելի և հասանելի կառուցել այն:

««Դրամատուրգիա» բաժնում առանձնացվել են թարգմանական և այլ պիեսներ: Կայքում կարելի է գտնել «Դրամատուրգիա» հանդեսի արխիվը: «Թատրոն» բաժնում   ներկայացվելու են թատերական անցուդարձները, ներկայացումները, կլինեն վերլուծություններ, հոդվածներ, ապագայում նաև հարցազրույցներ:

«Պատկերասրահ» բաժնում կզետեղվեն տարբեր ներկայացումների լուսանկարները: Առանձնացվել է «Գրադարակ» բաժինը, որտեղ հնարավոր կլինի գտնել թատերական գրականությունը, իսկ «Աֆիշա» բաժնում կտեղադրվեն բեմադրվող պիեսների պաստառներ»,-շեշտեց Վարդանյանը:

Կայքին կարելի է հետևել ֆեյսբուքի միջոցով:

Tatron-drama.am-ի առջև դրված խնդիրները հետևյալն են` թատերական միտումների վիրտուալ ստեղծում, կայքի էջերի հրապարակումներով նեղ մասնագիտական շրջանակից բացի` մերձթատերական հասարակական շերտի ներգրավում:

Ընդհանուր հարթակ ստեղծելով բեմադրիչների և թատերագիրների համար, նպաստել երկուստեք ստեղծագործական փոխադարձ հետաքրքրությանը և հետագա համագործակցությանը: Կայքում ստեղծված պիեսների շտեմարանը կօգնի բեմադրիչներին գնել իրենց հետաքրքրող ստեղծագործությունը:

Դասական և ժամանակակից հեղինակների պիեսների տեքստերի, ինչպես նաև թարգմանական գործերի հրապարակում, ստեղծվող շտեմարանի հիմքը 2000 թվականից պարբերաբար տպագրվող «Դրամատուրգիա» հանդեսն է:

Կայքը ստեղծվել է ՀՀ մշակույթի նախարարության աջակցությամբ:

Լուսանկարները` Տաթև Դուրյանի