Ադրբեջանցիները փորձել են թմրանյութ անցկացնել Ադրբեջան
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Ադրբեջանի պետական սահմանապահ ծառայության աշխատակիցները Կասպից ծովի Ադրբեջանի սահմանամերձ հատվածում լողացող նավակ են նկատել և, մոտենալով, պարզել են, որ Ադրբեջանի քաղաքացիներ Գուլիև Ալիագա Ռաուֆ օղլուն և Գուլիև Սեյմուր Միրզահասան օղլուն փորձում են թմրանյութ անցկացնել երկիր:
Այս մասին, ինչպես հաղորդում է «Արմենպրես»-ը, հայտնում է ադրբեջանական ԱՊԱ լրատվական գործակալությունը:
Նավակի զննման արդյունքում հայտնաբերվել և առգրավվել են տարբեր տեսակի 11,9 կգ թմրանյութային միջոցներ:
Ադրբեջանում 2010-2017 թթ. հաշվառված թմրամոլների թիվը 5 հազարով ավելացել է:
Ադրբեջանի առողջապահության նախարարության հաղորդած տվյալների համաձայն` 2010 թ. երկրում թմրամիջոցներ օգտագործողների թիվը կազմել է 25 հազար 489 մարդ, 2011 թ.` 26 հազար 716, 2012թ.` 27 հազար 910, 2013 թ.` 28 հազար 376, 2014 թ.` 28 հազար 656, 2015 թ.` 28 հազար 555, 2016 թ.` 29 հազար 448, 2017թ.՝ 30 հազար 131:
ՄԱԿ-ի զեկույցի համաձայն՝ Աֆղանստանից Եվրոպա թմրանյութերի փոխադրման «Հյուսիսային բալկանյան ուղին» անցնում է հենց Ադրբեջանով: Թմրանյութերն Իրան-Ադրբեջան-Թուրքիա ուղիով փոխադրվում են առանց խոչընդոտների:
Ադրբեջանցի որոշ փորձագետների պնդմամբ` հերոինը հիմնականում Աֆղանստանից տեղափոխվում է Իրան, Իրանից՝ Ադրբեջան, Ադրբեջանից՝ Եվրոպա: Այդ թմրանյութերը ԱՖղանստանից ձեռք են բերվում 3 մլրդ դոլարի չափով և փոխադրվելով Եվրոպա՝ վաճառվում 32 մլրդ դոլարով:
Բաժանորդագրվեք մեր ալիքին Telegram-ում