«Բանանց»-ը 1:2 հաշվով պարտվել է Կարագանդայի «Շախտյոր»-ին
ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: Երևանի «Բանանց»-ը թուրքական Բելեկ քաղաքում ուսումնամարզական հավաքի շրջանակում ընկերական հանդիպում է անցկացրել Կարագանդայի «Շախտյոր»-ի հետ: «Արմենպրես»-ի փոխանցմամբ, հանդիպումն ավարտվել է 1:2 հաշվով՝ հօգուտ ղազախական ակումբի:
Առաջինը հաշվի մեջ առաջ են անցել «Շախտյոր»-ի ֆուտբոլիստները, սակայն երևանցիներին հաջողվել է հավասարեցնել այն: Գոլի հեղինակ է դարձել կիսապաշտպան Ռումյան Հովսեփյանը: Առաջին կեսի ավարտին ղազախ ֆուտբոլիստները արագ հակագրոհ են կազմակերպել և այն ավարտել հաղթական գոլով:
Շախտյորը Ղազախստանի լավագույն թիմերից մեկն է: Նախորդ առաջնությունում զբաղեցրել է մրցաշարային աղյուսակի 6-րդ հորիզոնականը: 2011 և 2012 թվականներին թիմը դարձել է Ղազախստանի չեմպիոն, իսկ 2013/14 մրցաշրջանում դարձել է ղազախական առաջին ակումբը, որը մասնակցել է Եվրոպա լիգայի խմբային փուլին:
Մինչ այս «Բանանց»-ը 1:1 հաշվով էր ավարտել հանդիպումը ուկրաինական «Ստալ»-ի հետ:
Բաժանորդագրվեք մեր ալիքին Telegram-ում