«Մայիսյան հերոսամարտերի 100-ամյակին ընդառաջ» նախաձեռնությունը փորձում է ճանաչելի դարձնել անհայտ հերոսներին
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: «Մայիսյան հերոսամարտերի 100-ամյակին ընդառաջ» նախաձեռնությունը փորձում է ակտիվացնել Մայիսյան հերոսամարտերի թեման: Կազմակերպվում են միջոցառումներ, ինչպես նաև նախաձեռնությունը զբաղվում է այդ օրերի ոչ այնքան հայտնի հերոսներին հանրությանը ներկայացնելով: «Արմենպրես»-ի հաղորդմամբ՝ հունվարի 22-ին լրագրողների հետ հանդիպմանն այս մասին ասաց նախաձեռնության անդամ Տիգրան Մարտիրոսյանը:
«Նախաձեռնության ձևավորման նախապատրաստական աշխատանքները տարվել են 2015-ից: Փորձում ենք հերոսամարտերի 100-ամյակին ընդառաջ ակտիվացնել այդ թեման: Նախաձեռնության շրջանակներում դիմել ենք Դիլիջանի քաղաքապետարանին այնտեղ հերոս Գուրգեն Տեր-Մովսիսյանի փոքրիկ հուշաքարը տեղադրելու համար: Գուրգեն Տեր-Մովսիսյանի մասին քիչ է խոսվել, սակայն նա Ղարաքիլիսայի ճակատամարտում մեծ դերակատարություն է ունեցել: Թեև ծրագրվածը դեռ չի իրականացել, սակայն փորձելու ենք նրա և քիչ հայտնի շատ հերոսների մասին լուսաբանել»,-ասաց Մարտիրոսյանը:
Նախաձեռնությունը տարբեր առաջարկներ է ուղղել նաև ՀՀ կառավարությանը: «Առաջարկել ենք Արամ Մանուկյանի տուն-թանգարան կառուցել Երևանի Արամի փողոցում: Այն շատ կարևոր կլինի ոչ միայն Արամ Մանուկյանի, այլ նաև պատմական ողջ ընթացքը լուսաբանելու առումով: Առաջարկել ենք նաև Շուշիում Արամ Մանուկյանի տունը վերածել տուն-թանգարանի»,-ասաց Մարտիրոսյանը:
Նախաձեռնության անդամները նաև «Facebook» սոցիալական ցանցում ստեղծել են էջ, տեղադրել և տարածել թեմային վերաբերող նյութեր: «Նախորդ տարի մայիսի 28-ին փոքրիկ միջոցառում կազմակերպեցինք, պատրաստեցինք տարբեր իրեր, մշակեցինք նաև լոգոտիպ: Այդ լոգոտիպով տարբեր համայնքներում՝ Դիլիջանում, Եղեգնաձորում, Գյումրիում կազմակերպեցինք փոքրիկ միջոցառումներ: Այսպիսով` փորձեցինք թեման ակտիվացնել»,-եզրափակեց նախաձեռնության անդամը:
Բաժանորդագրվեք մեր ալիքին Telegram-ում