Նիկոլ Փաշինյանը բացառում է, որ «Ծառուկյան» խմբակցությունը կարող էր չստանալ նախագահի իրենց թեկնածուին սատարելու գրությունը
ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: Ազգային ժողովի «Ելք» խմբակցության ղեկավար Նիկոլ Փաշինյանն արձագանքել է «Ծառուկյան» խմբակցության ղեկավար Գագիկ Ծառուկյանի հայտարարությանը, թե իրենք «Ելք» խմբակցությունից ՀՀ նախագահի իրենց թեկնածուին աջակցելու վերաբերյալ դիմում չեն ստացել: Ազգային ժողովում լրագրողների հետ զրույցում Նիկոլ Փաշինյանն արձանագրեց, որ «Ծառուկյան» խմբակցությունը չէր կարող տացած չլինել իրենց պաշտոնական գրությունը: «Այդ գրությունը մենք պաշտոնապես ուղարկել ենք, դա ֆիքսվել է: Ես ինքս Վահե Էնֆիաջյանի ձեռքին այդ նամակի տպագրված տարբերակը տեսել եմ»,- «Արմենպրես»-ի փոխանցմամբ՝ ընդգծեց Նիկոլ Փաշինյանը:
Նա հավելեց, որ Հայաստանի Հանրապետության նախագահի ընդդիմադիր թեկնածու չառաջադրելը նշանակում է կանաչ լույս վառել մեծամասնության թեկնածուի համար, ինչն իրենց համար շատ ցավալի փաստ է: «Այս խորհրդարանի մարմինների ձևավորման ընթացքում մենք հայտարարել և կողմ ենք քվեարկել «Ծառուկյան» դաշինքի բոլոր թեկնածուների օգտին: Մենք դա արել ենք անկախ ամեն ինչից, որպեսզի կարողանաք ձևավորել առավել արդյունավետ ընդդիմադիր դաշտ: Սակայն այդ ջանքերն առայժմ ցանկալի արդյունք չեն տալիս, և դա ցավալի է»,- ասաց Փաշինյանը:
Ազգային ժողովի «Ելք» խմբակցությունը հայտարարել էր ՀՀ նախագահի թեկնածուի պաշտոնում Արտակ Զեյնալյանի թեկնածությունն առաջադրելու մտադրության մասին: Քանի որ նախագահի թեկնածու կարող են առաջադրել պատգամավորների ընդհանուր թվի 3/5-րդը, «Ելք» խմբակցությունը դիմել էր «Ծառուկյան» խմբակցությանը՝ իրենց թեկնածուին սատարելու համար: Ավելի ուշ ԲՀԿ առաջնորդ, «Ծառուկյան» խմբակցության ղեկավար Գագիկ Ծառուկյանը հայտարարել էր, որ իրենք «Ելք» խմբակցությունից իրենց թեկնածուին սատարելու մասին գրություն չեն ստացել:
Բաժանորդագրվեք մեր ալիքին Telegram-ում