Միկոյան եղբայների տուն-թանգարանը հիմնանորոգումից հետո ներկայանում է ժամանակակից ցուցադրությամբ
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Անաստաս և Արտեմ Միկոյան եղբայրների՝ Լոռու մարզի Սանահին գյուղում գտնվող տուն-թանգարանի հիմնանորոգումից հետո այն ներկայանում է ժամանակակից չափանիշներին համապատասխան նոր ցուցադրությամբ:
«Արմենպրես»-ի հաղորդմամբ` թանգարանում ցուցադրված են Միկոյանների ընտանիքի անձնական իրերը, նրանց աշխատանքային գործունեության մասին պատմող վավերագրական նյութերը:
«Լուքինգ Ֆորվարդ» տուրիզմի զարգացման հիմնադրամի աջակցության շնորհիվ` թանգարանը կապիտալ վերանորոգրվել է, ցուցանմուշները թարմացվել:
«Հաջորդ տարվա մարտից կբերվեն հուշանվերներ,որոնք վաճառքի են հանվելու: Նախատեսվում է նաև տեղում պատրաստել հուշանվերները ` փոքրիկ ՄԻԳ ինքնաթիռներ, էջանիշներ, օրացույցեր և այն»,- նշեց հիմադրամի աշխատակից Մարինե Բլբուլյանը:
Տուն-թանգարանում առկա է բազմալեզու գրադարան իր ընթերացասրահով, ինչպես նաև տեղադրվել են սենսորային էկրաններ, որտեղ մարդիկ կարող են համացանցի միջոցով ծանոթանալ Միկոյան եղբայրների գործունեության մանրամասներին:
Մարինե Բլբուլյանի խոսքով` եթե նախկինում տուն-թանգարան այցելում էր տարեկան 2300-2500 մարդ, ապա հիմնանորոգումից մեկ ամիս անց այցելուների թիվը կազմել էր 900 մարդ:
Լոռու մարզի Սանահին գյուղում գտնվող Անաստաս և Արտեմ Միկոյան եղբայրների տուն-թանգարանը հիմնադրվել է 1971 թվականին: Թանգարանը հիմնադրել է Միկոյանների հորեղբոր աղջիկը՝ Նուշիկ Միկոյանը։ Հուշահամալիրը և թանգարանը բացվել են 1982 թվականի հունիսի 17-ին: Հենց այդ օրը Մոսկվայից Հայաստան են բերվել ՄԻԳ-21 ինքնաթիռը և Արտեմ Միկոյանի ծառայողական մեքենան։ Տուն-թանգարանը տարիների ընթացքում հարստացվել է նաև այլ ցուցադրանմուշներով: Թանգարանի բակում են գտնվում Արտեմ և Անաստաս Միկոյանների հուշարձանները:
Նյութը պատրաստվել է «Բացահայտիր երկիրդ» արշավի շրջանակում՝ ՀՀ տնտեսական զարգացման և ներդրումների նախարարության Զբոսաշրջության պետական կոմիտեի և Հայաստանի զբոսաշրջության զարգացման հիմնադրամի աջակցությամբ:
Բաժանորդագրվեք մեր ալիքին Telegram-ում