«Կարոտի կանչով հերոսներիս հետ» խորագրով համերգը կնվիրվի արցախյան պատերազմի բոլոր ժամանակների զոհերի ծնողներին
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: «Դու ինչ ես անում Արցախի համար» շարժման շրջանակում կազմակերպվող «Կարոտի կանչով հերոսներիս հետ» խորագրով համերգի նպատակը արցախյան պատերազմի բոլոր ժամանակների զոհված հերոսների հիշատակը ևս մեկ անգամ հարգելն է: Համերգը կնվիրվի զոհված տղաների ծնողներին:
«Արմենպրես»-ի հաղորդմամբ՝ նոյեմբերի 22-ին լրագրողների հետ զրույցում այս մասին ասաց համերգը նախաձեռնած ժողովրդական երգիչ Գևորգ Չամքանյանը:
«Լինելով զոհված հերոսի եղբայր՝ որոշեցի ազգային երգի երեկո կազմակերպել և այն նվիրել բոլոր ժամանակների արցախյան պատերազմում զոհված տղաների ընտանիքներին: Լոս Անջելեսից այդ նպատակով եմ եկել Հայաստան: Հենց այնտեղից գտա մի քանի ընտանիքների հեռախոսահամարներ, նրանց հետ կապ հաստատեցի: Զգացի, որ նրանք ևս սպասում են այդ համերգին, նույնիսկ օգնություն առաջարկեցին»,-ասաց Չամքանյանը:
Համերգի հանդիսատեսը լինելու են զոհված տղաների ծնողները: Մուտքը լինելու է միայն հրավիրատոմսերով: Նրա խոսքով՝ անգամ չի մտածել տոմս վաճառելու մասին: Բազմաթիվ մարդիկ են գալու Ամասիայից, Արթիկից, Գյումրիից և այլ հեռավոր շրջաններից: Երգիչը ցավով նշեց, որ այդ թեմային նվիրված համերգին դահլիճը լեփ-լեցուն է լինելու: «Երանի այդ թեմայով համերգ կազմակերպեի, և դահլիճում մարդ չլիներ»,-ընդգծեց Չամքանյանն ու հավելեց՝ ծնողներն ասել են, որ եռագույն դրոշներով են գալու դահլիճ, նրանք գալու են հաղթանակած համերգի:
Զոհվածների ընտանիքներ կատարած այցերի ժամանակ երգիչը հասկացել է, որ մարդիկ ուզում են, որ այդ թեմայով համերգը լինի ամենամյա: Եվ որոշել է այն դարձնել ավանդական: Համերգին ելույթ կունենան նաև Գոհար Հովհաննիսյանը, Գևորգ Չամքանյանի որդին՝ Ասատուր Չամքանյանը, ասմունքով հանդես կգա Արսեն Ղազարյանը: Համերգը կվարի Սարգիս Նաջարյանը:
«Կարոտի կանչով հերոսներիս հետ» խորագրով համերգը կկայանա Արամ Խաչատրյան համերգասրահում նոյեմբերի 24-ին, ժամը 18:30-ին:
«Դու ինչ ես անում Արցախի համար» շարժումն իրականացվում է ՀՀ սփյուռքի նախարարության աջակցությամբ:
Բաժանորդագրվեք մեր ալիքին Telegram-ում