Երևանի թատրոնի և կինոյի պետական ինստիտուտի տնօրենն ԱրՊՀ-ում հանդես է եկել դասախոսությամբ
ՍՏԵՓԱՆԱԿԵՐՏ, 16 ՆՈՅԵՄԲԵՐԻ, ԱՐՄԵՆՊՐԵՍ-ԱՐՑԱԽՊՐԵՍ: «Ոչ ֆորմալ կրթություն» ծրագրի շրջանակներում նոյեմբերի 16-ին Արցախի պետական համալսարանում «Մշակույթը հայրենիքում» թեմայով դասախոսությամբ հանդես է եկել Երևանի թատրոնի և կինոյի պետական ինստիտուտի տնօրեն, պրոֆեսոր Դավիթ Մուրադյանը:
Դասախոսությանը նախորդել է ԱրՊՀ ռեկտոր Մանուշ Մինասյանի բացման խոսքը, ով արժևորել է Դավիթ Մուրադյանի ունեցած մեծ ներդրումը հայ մշակույթի զարգացման գործում:
Ներկայացնելով դասախոսության թեման՝ բանախոսն անդրադարձել է մշակույթի զարգացման պատմությանը և դրանում գործող ազգային ավանդույթներին:
«Մշակույթը ազգի ընդհանրական գոյությունն է, և բոլորս էլ նրա կրողներն ենք: Մենք այնպիսին ենք, ինչպիսին ձևավորել է մեզ արվեստը»,- նշել է պրոֆեսորը և ավելացրել, որ փիլիսոփայական իմաստով մշակույթի առաքելությունը միավորիչ գաղափարն է և այդ արժեքների գնահատումը:
«Արցախպրես»-ի հետ զրույցում Դավիթ Մուրադյանը նշել է, որ միշտ էլ հաճելի է Արցախ այցելելը և հավելել, որ արցախցի ուսանողների հետ առաջին հանդիպումն արդյունավետ համագործակցության հիմք է:
Հանդիպմանը ուսանողները հնչեցրել են տարաբնույթ հարցեր, ծավալվել քննարկում:
Բաժանորդագրվեք մեր ալիքին Telegram-ում