Ծանրորդ Կարեն Մարգարյանը դարձավ Եվրոպայի պատանիների առաջնության բրոնզե մեդալակիր
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Պատանի ծանրորդները շարունակում են հաջող ելույթները Եվրոպայի առաջնությունում:
«Արմենպրես»-ի հաղորդմամբ՝ Կոսովոյում շարունակվող ծանրամարտի Եվրոպայի առաջնությունում մինչև 17 տարեկանների պայքարում 77 կգ քաշային Կարեն Մարգարյանը պոկեց 136 կգ և հրեց 160 կգ: Երկամարտի 296 կգ արդյունքով Մարգարյանը զբաղեցրեց 3-րդ տեղը: Հայաստանի մեկ այլ ներկայացուցիչ՝ Արա Աղանյանը պոկեց 131 կգ և հրեց 162 կգ և երկամարտում հավաքեց 293 կգ և զբաղեցրեց 4-րդ տեղը:
Ավելի վաղ, Եվրոպայի առաջնությունում մինչ 17 տարեկանների պայքարում 69 կգ քաշային կարգում Արմեն Գրիգորյանը պոկեց 134 կգ և հրեց 162 կգ և երկամարտի 296 կգ արդյունքով զբաղեցրեց առաջին տեղը: Նույն քաշային կարգում Ռաֆիկ Հարությունյանը պոկեց 135 կգ ու հրեց 160 կգ և դարձավ բրոնզե մեդալակիր: Եվրոպայի առաջնությունում մինչև 15 տարեկանների պայքարում Ղահրամանյանը պոկում վարժությունում գլխավերևում պահեց 105 կգ, իսկ հրումում՝ 133 և երկամարտի 238 կգ արդյունքով դարձավ Եվրոպայի չեմպիոն 69 կգ քաշային կարգում: Արա Պողոսյանը երկամարտի 186 կգ արդյունքով նվաճել էր իր տարիքային խմբի Եվրոպայի չեմպիոնի կոչումը: Նա փոքր ոսկի էր նվաճել նաեւ հրում վարժությունում (105 կգ) եւ արծաթ՝ պոկումում (81 կգ): Մոնթե Մխիթարյանը 193 կգ-ով արծաթե մեդալի արժանացավ երկամարտում, սակայն հավասարը չունեցավ պոկում վարժությունում (91 կգ), իսկ հրումում (102 կգ) բավարարվեց բրոնզե մեդալով:
Լուսանկարը՝ Mediamax
Բաժանորդագրվեք մեր ալիքին Telegram-ում