Ավագ դպրոցների աշակերտների համար հնարավոր է վճարովի պրակտիկա կազմակերպվի
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Ավագ դպրոցի աշակերտներին, ովքեր չեն ցանկանում բարձրագույն կրթություն ստանալ, հնարավորություն է տրվելու արհեստ սովորել` վճարովի պրակտիկայի կազմակերպման միջոցով:
«Արմենպրես»-ի հաղորդմամբ` այս մասին լրագրողների հետ զրույցում ասաց ՀՀ կրթության և գիտության նախարար Լևոն Մկրտչյանը:
«12-ամյա կրթությունը բավականին բարձր ձող է, որին դժվար է հասնել: Մենք գործ ունենք 17-18 տարեկան երեխայի հետ և այնպես պիտի անենք, որ երեխային ընտրություն տանք։ Եթե նա չի ուզում բարձրագույն կրթության գնալ, ապա նրան կարող ենք հնարավորություն տալ որևէ արհեստ սովորելու, որով նա կարող է հետագայում իր հացը վաստակել», - նշեց նախարարը։
Նախարարի խոսքով՝ երեխաների ներկայությունը դպրոցում նախարարությունը կարող է ապահովել աշակերտներին շահագրգռելով` վճարովի պրակտիկաների միջոցով։
«Պիտի այնպիսի պայմաններ ապահովենք, որ երեխան վճարովի պրակտիկա գնա, ստանա որակավորում ու հասկանա, որ ունի իր հացը», - ընդգծեց Մկրտչյանը և հավելեց, որ ավագ դպրոցների կայացման գործում կարևոր է նաև ուսուցիչների և տնօրենների՝ աշակերտներին ցուցաբերած մոտեցումը։
Բաժանորդագրվեք մեր ալիքին Telegram-ում