ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Լրագրողների իրավունքների պաշտպանությունը Հայաստանի Մարդու իրավունքների պաշտպանի աշխատանքի առաջնահերթություններից է: Ազգային ժողովում լրագրողների հետ զրույցում ՀՀ Մարդու իրավունքների պաշտպան Արման Թաթոյանն ընդգծեց, որ միանշանակ է, որ երկրում լրագրողները պետք է պաշտպանված լինեն: «Հուլիսին ոստիկանության ՊՊԾ գնդի գրավման իրադարձությունների ժամանակ, կարծում եմ, շատ խիստ գնահատականներ կան իմ զեկույցում, և այդ արտահերթ զեկույցի հիման վրա արդեն առաջարկներ են ներկայացվել քրեական հետապնդման մարմիններին։ Այնտեղ հետևությունն այն է, որ լրագրողների աշխատանքի խոչընդոտը նպատակ է հետապնդել պատժել նրանց, որովհետև բռնությունները շարունակվել էին նաև այն ժամանակ, երբ լրագրողը դադարեցրած է եղել իր աշխատանքը: Ավելին՝լրագրողի աշխատանքի խոչընդոտման դրսևորումը եղել է թիրախային՝ նպատակ հետապնդելով ստիպել լրագրողին, որպեսզի դադարեցնի լրագրողական աշխատանքը»,-«Արմենպրես»-ի հաղորդմամբ՝ ասաց նա: