ՀՅԴ-ն կառավարության կողմից լուրջ քայլեր տեսել է և վստահության քվե է տալիս
17:11, 7 Հունիս 2017
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Ազգային ժողովի ՀՅԴ խմբակցության ղեկավար Արմեն Ռուստամյանը չի շտապում կանխատեսումներ անել, թե 2018թ. ով կզբաղեցնի Հայաստանի Հանրապետության վարչապետի պաշտոնը: Ազգային ժողովում լրագրողների հետ զրույցում Արմեն Ռուստամյանն ընդգծեց, որ չի կարող ասել՝ 2018թ. շարունակելո՞ւ է պաշտոնավարել Կարեն Կարապետյանը ՀՀ վարչապետի պաշտոնում, թե ոչ: «2018 թվականը կգա, կտեսնենք, թե ով կլինի վարչապետը: Մենք վաղվա եղանակի կանխատեսումը չենք կարող տալ, իսկ դուք ուզում եք, որ ես առաջիկա 5 տարվա կանխատեսում անել»,-«Արմենպրես»-ի հաղորդմամբ՝ նշեց Ռուստամյանը:
Նա ՀՀ կառավարության կողմից լուրջ քայլեր տեսել է: Հենց այդ քայլերը տեսնելով է ՀՅԴ-ն որոշել կոալիցիա կազմել իշխող Հանրապետական կուսակցության հետ: Արմեն Ռուստամյանն ընդգծեց, որ կառավարությունը իրենց մատնանշած որոշ խնդիրների լուծում տվել է, ուստի իրենք կառավարությանը վստահության քվե տալու առիթ ունեն:
Պատգամավորն անդրադարձավ նաև Շիրակի մարզպետին փոխելու վերաբերյալ հարցին: Նա նշեց, որ ցանկացած մարդ գիտի, որ հավերժական պաշտոններ չեն լինում: «Կուսակցությունը կարող է որոշել, թե որ անձը որտեղ կաշխատի: Այստեղ ոչ մի արտառոց բան չի կատարվել»,- ասաց Արմեն Ռուստամյանը:
Բաժանորդագրվեք մեր ալիքին Telegram-ում