ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: ՀՀ Ազգային ժողովի նախագահ Գալուստ Սահակյանը ծննդյան 95-ամյակի առթիվ շնորհավորել է ՀՀ ԳԱԱ ակադեմիկոս, պետական-հասարակական գործիչ Սերգեյ Համբարձումյանին: Այս մասին «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից:

ԱԺ նախագահի շնորհավորական ուղերձում ասվում է.

«Մի քանի տասնամյակներ ամփոփող Ձեր գիտամանկավարժական գործունեությունը համաշխարհային մակարդակի ականավոր գիտնականի ու մանկավարժի անմնացորդ ծառայություն է գիտությանը եւ կրթությանը:

Պետական ու հասարակական գործչի Ձեր գործունեությունը հզոր անհատականության անկեղծ նվիրում է երկրին ու ժողովրդին, անվարան հավատարմություն նրանց շահերին:

Երիտասարդների համար լավագույն օրինակ են անսպառ եռանդով ու էներգիայով լեցուն Ձեր կյանքն իր ողջ հարստությամբ, Ձեր մշտական հետաքրքրությունը եւ զգայուն վերաբերմունքը գիտական ու պետական-հասարակական կյանքում տեղի ունեցող գործընթացների հանդեպ»:

Ազգային ժողովի նախագահը հոբելյարին մաղթել է առողջություն, երկարակեցություն եւ ամենայն բարիք: