ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Զինծառայողների զինգրքույկներում ապրիլյան պատերազմին մասնակցելու վերաբերյալ գրանցված 200  ուսումնասիրված դեպքերից  հայտնաբերվել է  4-ը, որոնք ենթակա են ուղղման:

«Մենք  ունենք շատ արդյունավետ աշխատող թեժ գիծ, որը յուրաքանչյուր օր 100-150 զանգ է ընդունում: Թեժ գծում կան մասնագետներ, ովքեր հատուկ այդ թեմայով զբաղվում են. նրանք անուն առ անուն զբաղվում են այդ գործով՝ փորձելով  ուսումնասիրել դրանք:  Իհարկե, եղել են դեպքեր, երբ մարդը  եղել է այն զորամասում, որը մասնակցել է մարտական գործողություններին, սակայն այդ զինծառայողն անձամբ  այդ օրը մարտական հերթապահության չի եղել:  Եղել են նաեւ զինծառայողներ, ովքեր իրականում մասնակցել են, բայց սխալմամբ դա նրանց զինգրքույկներում չի նշվել: Այդ դեպքերը քիչ են, եւ դրանք բոլորը ուղղվող են: Կարեւորը, որ մենք ունենք համապատասխան գործիք խնդիրը լուծելու համար:  Բոլոր զինկոմիսարիատները  ստացել են աշխատանքի համապաստախան ուղեցույցները, եւ մեր համապատասխան վարչություններում այդ դեպքերն անհատական հիմքով են ուսումնասիրվում:  Մենք չունենք մեկ ընդհանուր լուծում բոլորի համար»,-«Արմենպրես»-ի փոխանցմամբ՝ եզրափակեց Վիգեն Սարգսյանը: