ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: ՀՀ տնտեսական զարգացման և ներդրումների նախարարի տեղակալ Էմիլ Տարասյանի՝ փետրվարի 11-ից 13-ը Իրան կատարած այցի նպատակներից էր իրանական կողմի հետ քննարկել Հայաստանում ԻԻՀ արտադրանքի համապատասխանության գնահատման մարմինների գրասենյակներ հիմնելու հարցը:

Ինչպես «Արմենպրես»-ին տեղեկացրին ՀՀ տնտեսական զարգացման և ներդրումների նախարարության տեղեկատվության և հասարակայնության հետ կապերի բաժնից, այցի ընթացքում կայացել են հանդիպումներ Իրանի արդյունաբերական հետազոտությունների և ստանդարտների ինստիտուտի (ISIRI) նախագահի տեղակալի հետ։ Ձեռք է բերվել համաձայնություն Հայաստանում «Հալալ»-ի գրասենյակներ բացելու վերաբերյալ` մասնավոր հատվածի հետ համագործակցությամբ, ինչը կնպաստի հայկական արտադրանքի սպառման ծավալների մեծացմանը, զբոսաշրջության աճին և կապահովի տեղական արտադրանքի մուտքը նոր շուկաներ: Իրանական կողմը պատրաստակամություն է հայտնել նշված գրասենյակները բացել արդեն իսկ ընթացիկ տարվա մարտին (մինչև Նովրուզի ազգային տոնը): «Հալալ»-ի կողմից կկազմակերպվեն հյուրանոցների և ռեստորանների անձնակազմի վերապատրաստման աշխատանքներ։

 Համաձայնություն է ձեռք բերվել արտադրանքի և ծառայությունների համապատասխանության գնահատման ոլորտում փոխըմբռնման հուշագիր ստորագրելու վերաբերյալ` երկուստեք հնարավորություն ստեղծելով համապատասխանության սերտիֆիկատներ տրամադրելու տնտեսվարող սուբյեկտներին:

Այդպիսով՝ հայկական արտադրանքի սերտիֆիկացումը կկազմակերպվի Իրանում, իսկ իրանական արտադրանքինը` Հայաստանում։ Նպատակն իրագործելու համար Հայաստանում կստեղծվեն լաբորատոր կարողություններ: