ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ պարենային անվտանգության ապահովման հայեցակարգից բխող միջոցառումների 2017-2021թթ. ծրագրով նախատեսվում է, որ 2021-ին Հայաստանը կկարողանա 74-76 տոկոսով իրեն ապահովել կարևորագույն մթերքներով։ «Արմենպրես»-ի հաղորդմամբ, այդ մասին կառավարության նիստում հայտարարեց ՀՀ գյուղատնտեսության նախարար Իգնատի Առաքելյանը՝ ներկայացնելով համապատասխան ծրագիրը:

Միջոցառումների իրականացման արդյունքում կենսականորեն կարևորագույն սննդամթերքի ինքնաբավության ներկայիս 60 տոկոս մակարդակի ցուցանիշն ակնկալվում է 2021թ. հասցնել 74-76 տոկոսի, անհրաժեշտ նախադրյալներ կստեղծվեն երկրի պարենային անվտանգության ապահովմանն ուղղված միջոցառումների փոխհամաձայնեցված և համակարգված իրականացման համար: Նախատեսվում է՝ տեղական արտադրության հաշվին բարձրացնել կարևորագույն սննդամթերքի նկատմամբ սպառողական պահանջարկի բավարարման մակարդակը, նախադրյալներ կստեղծվեն բնակչության կենսամակարդակի բարձրացման, աղքատության կրճատման, գյուղական համայնքների զարգացման համար: