Ադրբեջանում կրոնական հանցագործությունների համար սահմանված պատիժները ավելի են խստացել
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Ադրբեջանի քրեական օրենսգրքում առաջարկվող փոփոխությունների համատեքստում Ազգային ժողովի լիագումար նիստի ժամանակ քննարկվել է նաեւ կրոնական հանցագործություններ կատարած անձանց պատիժների խստացման հարցը:
Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական կայքը:
Ադրբեջանի գործող քրեական օրենսգրքի համաձայն` կրոնական ատելություն, կրոնական ծայրահեղականություն կամ մոլեռանդություն սերմանելու շարժառիթով գործունեություն ծավալող անձանց համար սահմանված է պատիժ 5 տարի ազատազրկման չափով: Ադրբեջանի ազգային ժողովի ընդունած փոփոխությունների համաձայն` վերոնշյալ կրոնական հանցագործությունների համար կսկսի կիրառվել 14-20 տարվա եւ ցմահ ազատազրկման պատիժներ:
Չնայած այն բանին, որ Ադրբեջանի սահմանադրությունը երաշխավորում է դավանության ազատությունը, կառավարությունը սահմանափակում է կրոնական, մասնավորապես, ոչ ավանդական խմբերի իրավունքները:
Ադրբեջանում խոչընդոտներ են ստեղծվում կրոնական համայնքների գրանցման, երկիր կրոնական գրականություն ներկրելու, նրա վաճառքի եւ տարածման համար: Միեւնույն ժամանակ իշխանությունների կողմից կրոնական հանդուրժողականության դասընթացներ են անցկացվում:
Ադրբեջանի կրոնական կառույցների հետ աշխատանքի գծով Պետկոմիտեի տվյալներով` բնակչության 69 տոկոսը մուսուլմաններ են: Նրանց 65 տոկոսը շիա, 35 տոկոսը` սունի է: Բնակչության 4 տոկոսը կազմում են ռուսական եւ վրացական ուղղափառ եկեղեցիների, հայ առաքելական եկեղեցու (ուտիներ) ներկայացուցիչները, ինչպես նաեւ այլ քրիստոնյաներ, մոլոկաններ, հրեաներ եւ բահաիտներ:
Բաժանորդագրվեք մեր ալիքին Telegram-ում