Թուրքիայի ներքին գործերի նախարարությունում 265 մարդ հեռացվել է ծառայությունից
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքիայում պետական ոլորտները գյուլենականներից մաքրելուն ուղղված գործողությունների շրջանակում ծառայությունից հեռացվել են ներքին գործերի նախարարության 265 աշխատակից:
Այս մասին, ինչպես հաղորդում է «Արմենպրես»-ը, հայտնում է թուրքական haberler.com լրատվական կայքը:
153 աշխատակից հեռացվել է Ժանդարմերիայի հրամանատարության կազմից, 112-ը` առափնյա անվտանգության հրամանատարության կազմից:
Ժանդարմերիայի կազմից հեռացվածներից 42-ը սպաներ են, 56-ը` ենթասպաներ, 30-ը` ժանդարմերիայի մասնագիտացված սերժանտներ, 17-ը` փորձագետներ եւ 8 տարբեր պաշտոններում գտնվող անձինք:
Առափնյա պաշտպանության ուժերից հեռացվել է 52 սպա, 58 ենթասպա, 1 փորձագետ, 1 պաշտոնյա:
Պաշտոնական Անկարան 2016 թվականի հուլիսի 15-ին տեղի ունեցաց հեղաշրջման փորձը կազմակերպելու եւ ղեկավարելու մեջ մեղադրում է «Հիզմեթ հարեքեթի» ազդեցիկ կրոնական շարժման առաջնորդ Ֆեթուլլահ Գյուլենին:
Ստամբուլի հանրապետական դատախազության ահաբեկչության եւ կազմակերպված հանցավորության դեմ պայքարի վարչության կողմից գյուլենականների դեմ ուղղված հետախուզական գործողությունների շրջանակներում արդեն 100-ավոր սպաներ են ձերբակալվել եւ հեռացվել աշխատանքից:
2016 թվականի հուլիսի 15-ին մի խումբ խռովարարներ Թուրքիայում ռազմական հեղաշրջման փորձ էին ձեռնարկել: Խռովարարներն իրենց հսկողության տակ էին վերցրել մի շարք ռազմավարական օբյեկտներ Անկարայում եւ Ստամբուլում, բայց մի քանի ժամ հետո խռովությունը ճնշվել էր:
Ռազմական հեղաշրջման փորձից հետո այդ երկրում արտակարգ դրության ռեժիմ է հաստատվել եւ զանգվածային գործողություններ են իրականացվում հեղաշրջման փորձի մասնակիցներին բացահայտելու եւ ձերբակալելու ուղղությամբ:
Բաժանորդագրվեք մեր ալիքին Telegram-ում