ՌԴ դեսպանը պարգեւատրեց չեռնոբիլյան աղետի հետեւանքների վերացմանը մասնակցած 5 փրկարարի
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում ՌԴ դեսպան Իվան Վոլինկինը պարգեւատրեց 1986 թվականին ապրիլի 26-ին Չեռնոբիլի ատոմակայանի վթարի հետեւանքների վերացմանը մասնակցած հայ փրկարարներին:
Չեռնոբիլյան աղետի ծանր պահին ուկրաինացի ժողովրդին օգնության ձեռք մեկնելու պատրաստակամություն են հայտնել եւ ԱԷԿ-ի վթարի փրկարարական աշխատանքներին իրենց արժանի մասնակցությունն են ունեցել նաեւ բազմաթիվ հայ փրկարարներ:
«Արմենպրես»-ի հաղորդմամբ` այսօր ՌԴ արտակարգ իրավիճակների նախարարության շքանշանների արժանացան Հայաստանի «Չեռնոբիլ միություն» հասարակական կազմակերպություն անդամներ Գեւորգ Վարդանյանը, Խաչատուր Քլիջյանը, Գեւորգ Մելքոնյանը, Արթուր Հարությունյանը, Երեմ Ավագյանը:
Հայաստանում ՌԴ դեսպան Իվան Վոլինկինն ընդգծեց աղետի ժամանակ աջակցություն ցուցաբերած անձանց մշտապես հիշելու անհրաժեշտությունը:
«Աղետը փոխեց հարյուրավոր մարդկանց ճակատագրեր` ոչ միայն գիտնականների, փրկարարների, զինվորների, հարակից տարածքներում ապրող բնակիչների, այլեւ թերեւս, ամբողջ աշխարհի: Այն պատճառեց խոշոր տնտեսական վնաս, որը թեպետ չի կարելի համեմատել այն վնասի հետ, որը հասցվեց մարդկանց եւ շրջակա միջավայրին: Այսօր մենք հնարավորություն ունենք վերհիշելու նրանց, ովքեր իրենց առողջության, իրենց կյանքի գնով պայքարել են սարսափելի աղետի հետեւանքների դեմ»,-ասաց դեսպանը:
Երեմ Ավագյանը մինչեւ այսօր առողջական խնդիրներ ունի եւ գտնվում է բժշկական վերահսկողության տակ, սակայն, միեւնույն է, չի զղջում արածի համար, քանի որ նրա խոսքով` այդ օրերին աղետը համախմբել էր բոլորին:
«1986 թվականին ծառայում էի բանակում, երբ աղետի հաջորդ օրը մեզ անմիջապես տեղափոխեցին ատոմակայանի տարածք: Ես զբաղվում էի քիմիական ուսումնասիրությամբ: Իսկ այս պարգեւատրումը կարեւոր էր ոչ միայն ինձ, այլեւ իմ ընկերների համար, ովքեր նույնպես մասնակցություն են ունեցել այդ աշխատանքներին: Սա ուշադրության եւս մեկ նշան է»,- մեզ հետ զրույցում ասաց նա:
30 տարի առաջ Ուկրաինայում Չեռնոբիլի ատոմակայանում տեղի ունեցած պայթյունը մարդկության պատմության մեջ մտավ որպես միջուկային խոշորագույն աղետներից մեկը: Այդ ժամանակաշրջանում Չեռնոբիլի ԱԷԿ-ը ամենախոշորն էր Խորհրդային Միությունում:
Բաժանորդագրվեք մեր ալիքին Telegram-ում