Մադրիդում ՀՀ անկախության 25-ամյակին նվիրված միջոցառում է կազմակերպվել
ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: Իսպանիայի Թագավորությունում Հայաստանի Հանրապետության դեսպանության կողմից Մադրիդում կազմակերպվել է ընդունելություն` նվիրված Հայաստանի Հանրապետության անկախության 25-ամյակին:
Ինչպես հաղորդում է «Արմենպրես»-ը, շնորհավորական ուղերձում Իսպանիայում ՀՀ դեսպան Ավետ Ադոնցն անդրադարձել է Հայաստանի Հանրապետության անկախության 25 տարիների գլխավոր ձեռքբերումներին, տարածաշրջանում տևական կայունություն և խաղաղություն հաստատելու կարևորությանը, ՀՀ-ԵՄ հարաբերություններին:
Դեսպան Ադոնցը խոսել է նաև հայ-իսպանական բարեկամական հարաբերությունների և դրանց մեծ ներուժի մասին: ՀՀ դեսպանն առանձնահատուկ ընդգծել է երկկողմ հարաբերությունների զարգացման գործում հայ համայնքի դերակատարությունը:
Միջոցառմանը մասնակցել են Իսպանիայի օրենսդիր և գործադիր մարմինների ներկայացուցիչներ, ԻԹ արտաքին քաղաքական և այլ պետական գերատեսչությունների բարձրաստիճան պաշտոնյաներ, ռեգիոնալ իշխանությունների ներկայացուցիչներ, հոգևորականներ, Իսպանիայում հավատարմագրված դիվանագիտական կորպուսի, գիտական և գործարար շրջանակների ներկայացուցիչներ, մշակութային գործիչներ, հայ համայնքի անդամներ։
Բաժանորդագրվեք մեր ալիքին Telegram-ում