ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: Սուրճի համաշխարհային օրը նշվում է սեպտեմբերի 29-ին։ Սուրճը վաղուց մոլորակի միլիոնավոր բնակիչների «լավագույն ընկերն» է դարձել։ «Արմենպրես»-ի հաղորդմամբ՝ որոշ տվյալներով` աշխարհում օրական 2.25 միլիարդ բաժակ սուրճ են խմում։

Հայաստանն այն երկրների շարքում է, որոնց բնակիչների մեծ մասը սուրճի մոլի սիրահարներ են։ Հայերը սուրճ են խմում միշտ և ամենուրեք, կլորին տարին, օրվա ցանկացած ժամին։

Այստեղ ամենատարածվածն արևելյան սուրճն է` «սև սուրճը»։ Շատ հաճախ հենց այս ըմպելիքի շուրջ են համախմբվում մարդիկ և սկսվում են հետաքրքիր խոսակցությունները: Եթե Հայաստանում դուք որևէ մեկին հյուր եք գնում, ձեզ անպայման հարցնում են` սուրճ ուզո՞ւմ եք։  Հիմնականում լուծվող սուրճը նախընտրում է երիտասարդությունը:

ՀՀ ազգային վիճակագրական ծառայության տվյալներով Հայաստանը 2015 թվականին արտահանել է 884.7 տոննա սուրճ (ներառյալ՝ փոխարինիչները, թեփուկները, հատիկների պատյանները), ընդհանուր 4 մլն 362 հազար 687 դրամ արժողությամբ: Եվ ներմուծվել է 11 հազար 430.4 տոննա սուրճ, 25 մլն 22 հազար 157 դրամ արժողությամբ:

Հետաքրքիր փաստեր սուրճի մասին

• Սուրճի արտադրության 40% կատարվում է Բրազիլիայում
• Սուրճամոլների 70%-ը խմում է «Արաբիկա» տեսակի սուրճ, իսկ 30%-ը՝ «Ռոբուստա», որը ավելի ցածր կարգի է, բայց ավելի դիմացկուն է չորացմանն ու հիվանդություններին, նրանից 2 անգամ ավելի շատ բերք կարելի է ստանալ, քան «Արաբիկայից»: «Արաբիկա»-ն իր մեջ պարունակում է 1% կոֆեին, իսկ «Ռոբուստա»-ն՝ 2%: Լուծվող սուրճ արտադրողները հիմնականում խառնում են այս երկու տեսակի սուրճերն իրար։
• Սուրճի ծառի երկարությունը կարող է հասնել 9 մետրից մի փոքր շատ, սակայն ինչքանով որ հարմար է սուրճը հավաքել ավելի փոքր բարձրությունից, այժմ սուրճի ծառի բարձրությունը հազվադեպ է անցնում 3 մետրը։
• Սուրճի ամենամեծ սիրահարներն ապրում են ԱՄՆ-ում, ամենաշատ սուրճը խմում են հենց ԱՄՆ-ում։
• Գոյություն ունի սուրճի պատրաստման մի քանի հազար ձև՝ այդ թվում նաև կարմիր պղպեղով, սխտորով և նույնիսկ կարագով։ Սակայն այս բոլոր ձևերի մեջ ամենաօգտակարը սուրճի պատրաստման Սկանդինավյան ձևն է։
• Աշխարհում ամենաշատ վաճառվող ապրանքների մեջ սուրճը զբաղեցնում է երկրորդ հորզոնականը. Առաջին հորիզոնականում նավթն է։
• Սուրճն այժմ ավելի, քան 700 տարեկան է։
• Առանց շաքարավազի սև սուրճի կալորիականությունը 0 է։
• Ամերիկանո տեսակի սուրճն առաջացել է Երկրորդ համաշխարհային պատերազմի ժամանակ՝ ամերիկացի զինվորները չէին կարողանում խմել եվրոպական սուրճը, այդ իսկ պատճառով նրանք ջուր ավելացրին այդ սուրճի վրա։
• Սուրճի ակնթարթային ազդեցությունը միֆ է. իրականում սուրճն ազդում է խմելուց 30 րոպե անց, և նրա ազդեցությունը մնում է 2-6 ժամ։