Հայաստանում կապամոնտաժվեն սեյսմակայունություն չունեցող հինգ դպրոցներ և կկառուցվեն նորերը
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Կառավարությունն ընդունեց «Անհատույց սեփականության իրավունքով գույք հանձնելու և քանդման (ապամոնտաժման) աշխատանքներ կազմակերպելու մասին» որոշում, որով առաջարկվում է ՀՀ օրենսդրությամբ սահմանված կարգով կազմակերպել ՀՀ ԿԱ պետական գույքի կառավարման վարչության տնօրինության 5 դպրոցի ապամոնտաժման աշխատանքները:
ՀՀ պետական գույքի կառավարման վարչության պետի տեղակալ Աշոտ Մարկոսյանը նշեց, որ կառավարության և Ասիական զարգացման բանկի՝ դպրոցների սեյսմիկ անվտանգության բարելավման ծրագրի շրջանակում ՀՀ սեփականություն հանդիսացող մի շարք դպրոցների քանդման և նոր շենքերի կառուցման գործընթացն արժանացել է հավանության, և առկա է Հայաստանի տարածքային զարգացման հիմնադրամի հոգաբարձուների խորհրդի համաձայնությունը գործընթացի իրականացման վերաբերյալ:
Վարչապետ Հովիկ Աբրահամյանը հետաքրքրվեց, թե ինչու են դպրոցը կառուցող և ապամոնտաժող ընկերությունները տարբեր և ավելացրեց, որ ճիշտ կլիներ, եթե այն ընկերությունը, որը կառուցելու է, նա էլ ապամոնտաժի դպրոցների շենքը: Աշոտ Մարկոսյանը պատասխանեց՝ մտահոգություն ունեն, որ եթե ապամոնտաժող և կառուցող ընկերությունները նույնը լինեն, ապա ապամոնտաժված գույքը հետագայում կարող են օգտագործել դպրոցի շինարարության համար:
«Անհիմն բան եք ասում»,- իր հերթին նշեց Հովիկ Աբրահամյանը:
Իր հերթին, Տարածքային կառավարման և զարգացման նախարար Դավիթ Լոքյանը պարզաբանեց՝ պայմանավորվածություն է ձեռք բերվել ապամոնտաժման դիմաց ոչ թե գումար հատկացնել, այլ հենց ապամոնտաժված գույքը:
Բաժանորդագրվեք մեր ալիքին Telegram-ում