Ազիզ Թամոյանի համոզմամբ՝ Երեւանում ստեղծված իրավիճակի միակ լուծումը փոխզիջումն է
ԵՐԵՎԱՆ, 23 ՀՈՒԼԻՍ, ԱՐՄԵՆՊՐԵՍ: Աշխարհի և Հայաստանի եզդիների միության նախագահ, Աշխարհի ժողովուրդների հոգևոր միասնության միջազգային ակադեմիայի ակադեմիկոս Ազիզ Թամոյանը կարծում է, որ Հայաստանում ստեղծված վիճակի միակ լուծումը փոխզիջումն է:
«Պետք չէ թշնամու ջրաղացին ջուր լցնել: Կարծում եմ՝ երկու կողմերն էլ իրենց մեջ պետք է ուժ գտնեն եւ թույլ չտան արյունահեղություն, համագործակցեն միմյանց հետ: Պետք է խաղաղ ձեւով լուծում գտնել»,- «Արմենպրես»-ի հաղորդմամբ՝ այս մասին լրագրողների հետ զրույցում նշեց Ազիզ Թամոյանը:
Նրա խոսքով՝ համայնքի համար դժվար չէ գնալ Խորենացի փողոց, սակայն վստահ չէ, որ դա ինչ-որ կերպ օգուտ կտա ստեղծված իրավիճակի լուծմանը:
«Պոնտի» հունական համայնքի երիտասարդական թևի ներկայացուցիչ Նիկոլայ Նիկոլայիդին նույնպես համակարծիք է, որ չպետք է թույլ տալ արյունահեղություն:
«Հունական համայնքը նախեւառաջ ցավակցում է ոստիկանի ընտանիքին, եւ կարծում, որ միայն ժողովուրդը կարող է կանխել արյունահեղությունը՝ անկախ նրանից իշխանամետ է, թե ընդդիմադիր. ժողովուրդը պետք է համախմբվի»,- եզրափակեց նա:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:
ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:
Բաժանորդագրվեք մեր ալիքին Telegram-ում