Սիրիան Թուրքիայից պահանջել է հարգել իր ինքնիշխանությունը
ԵՐԵՎԱՆ, 2 ՓԵՏՐՎԱՐԻ, ԱՐՄԵՆՊՐԵՍ: Թուրքիայի հրետանին հարվածներ է հասցրել սիրիական Ջեբալ Աթերա շրջանին, արդյունքում մեծ թվով խաղաղ բնակիչներ զոհվել են: Սիրիայի կառավարությունը Թուրքիայից պահանջել է դադարեցնել երկրի ինքնիշխանության խախտումը եւ հարգել միջազգային օրենքները:
Ինչպես հաղորդում է «Արմենպրես»-ը` վկայակոչելով Sana լրատվական գործակալությունը, այս մասին հայտնել է Սիրիայի ԱԳՆ մամուլի ծառայությունը:
Սիրիայի ԱԳՆ-ն հայտնել է, որ Թուրքիայի հրետանին փետրվարի 1-ին հարվածներ է հասցրել Լաթաքիայի նահանգի հյուսիսում գտնվող Ջեբալ Աթերա շրջանին:
«Սիրիայի կառավարությունը Թուրքիայի նման գործողությունները միջազգային օրենքները խախտելու եւ Սիրիայում խաղաղ բնակչության դեմ հանցագործություն է համարում: Դամասկոսը պահանջում է դադարեցնել Սիրիայի ինքնիշխանության խախտումը եւ հարգանքով մոտենալ միջազգային օրենքներին», -ասվում է հայտարարության մեջ:
Փաստաթղթում նաեւ նշվում է, որ Սիրիայի Արաբական Հանրապետության ղեկավարությունը միջազգային հանրութունից պահանջել է նման հանցագործությունները դադարեցնելու համար ճնշում գործադրել Թուրքիայի կառավարության վրա եւ կոչ է արել հարկադրել Անկարային ենթարկվել ՄԱԿ-ի բանաձեւերին:
«Դամասկոսն իրեն իրավունք է վերապահում պատասխան տալ Թուրքիայի կողմից արվող նման հանցագործություններին», -նշված է հայտարարության մեջ:
Ռուսաստանի Դաշնության պաշտպանության նախարարությունը երեկ հայտարարել է, որ անհերքելի ապացույցներ ունեն Թուրքիայի զինուժի կողմից Սիրիայի տարածքը խոշոր տրամաչափի հրետանիով գնդակոծելու վերաբերյալ:
Բաժանորդագրվեք մեր ալիքին Telegram-ում