Գալուստ Սահակյանը հայտարարեց ՄԻՊ-ի լիազորությունների վաղաժամկետ դադարեցման մասին
12:22, 1 Փետրվար 2016
ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի նախագահ Գալուստ Սահակյանը հայտարարեց Մարդու իրավունքների պաշտպանի լիազորությունների վաղաժամկետ դադարեցման մասին: «Արմենպրես»-ի հաղորդմամբ՝ 5-րդ գումարման Ազգային ժողովի իններորդ նստաշրջանի մեկնարկին ԱԺ նախագահը հայտնեց, որ Մարդու իրավունքների պաշտպան Կարեն Անդրեասյանը հրաժարականի դիմում է ներկայացրել ու «Մարդու իրավունքների պաշտպանի մասին» ՀՀ օրենքի համաձայն՝ կրկնել է իր հրաժարականը: «Ուստի, ես հայտարարում եմ Մարդու իրավունքների պաշտպանի լիազորությունների վաղաժամկետ դադարեցման մասին»,- ասաց ԱԺ նախագահը:
Նա հավելեց, որ ԱԺ-ում Մարդու իրավունքների պաշտպանի ընտրությունը պետք է կայանա պաշտոնը թափուր մնալուց հետո մեկ ամսվա ընթացքում:
Բաժանորդագրվեք մեր ալիքին Telegram-ում