Ֆրանկ Բրանները Հայաստանում «բաց երկնքի» քաղաքականությունը զբոսաշրջության զարգացման նախադրյալ է համարում
ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Հայաստանում «բաց երկնքի» քաղաքականության ներդրման արդյունքում զբոսաշրջության զարգացման լուրջ հեռանկարներ կան: «Զվարթնոց» միջազգային օդանավակայանում կատարած շրջայցից հետո լրագրողների հետ զրույցում նման կարծիք հայտնեց Եվրոպական աերոնավիգացիայի անվտանգության գործակալության գլխավոր տնօրեն Ֆրանկ Բրանները: «Ես արդեն երրորդ անգամ եմ այցելում Հայաստան, և, օգտվելով առիթից, ցանկանում եմ ընդգծել, որ հիանում եմ այս երկրի գեղեցկությամբ: Ես կարծում եմ, որ Հայաստանում շատ տեսարժան վայրեր կան, որոնք կարող են գրավել զբոսաշրջիկների ուշադրությունը և Հայաստանը կկարողանա ավելի շատ զբոսաշրջային այցելություններ ունենալ, եթե ներդրվի «բաց երկնքի» քաղաքականությունը»,- «Արմենպրես»-ի հաղորդմամբ՝ ընդգծեց Բրանները:
Միևնույն ժամանակ, նա հավելեց, որ զբոսաշրջիկներին ներգրավելու համար կարևոր է ոչ միայն օրենսդրական դաշտի բարելավումը, այլ նաև երկրի ենթակառուցվածքների բարձր մակարդակը: «Ես ցանկանում եմ նաև հավելել, որ «Զվարթնոց» օդանավակայանը իր տեխնիկական հագեցվածությամբ, չափանիշներով, մարդկային ռեսուրսներով ի զորու է սպասարկել շատ ուղևորների»,- եզրափակեց Ֆրանկ Բրանները:
2013 թվականի հոկտեմբերի 23-ին Հայաստանի Հանրապետության կառավարությունը որոշում է ընդունել «Հայաստանի Հանրապետությունում մրցունակ և կայուն ավիափոխադրումների ծառայությունների մատուցման ծրագրի և ծրագրի իրականացման միջոցառումների մասին», որով հռչակվել է քաղաքացիական ավիացիայի և օդային հաղորդակցության ոլորտում Հայաստանում բաց երկնքի քաղաքականությունը:
Բաժանորդագրվեք մեր ալիքին Telegram-ում