ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: Եվրասիական տնտեսական միության շրջանակներում համաձայնեցված տրանսպորտային քաղաքականության հիմնական ուղղություններն ու դրա իրականացման փուլերը դարձել են անդամ-պետությունների ներկայացուցիչների հանդիպման քննարկման թեման: Ղազախստանի կողմից մշակված փաստաթուղթն առաջին անգամ է ներկայացվել կողմերի քննարկմանը: Ինչպես «Արմենպրես»-ին հայտնեցին Եվրասիական տնտեսական հանձնաժողովի լրատվական ծառայությունից, հիմնական ուղղությունները, որոնք պետք է հաստատվեն 2016-ին, կնպաստեն միասնական տրանսպորտային տարածության  և ԵԱՏՄ տրանսպորտային ծառայությունների ընդհանուր շուկայի ձևավորմանը:

ԵԱՏՄ-ի անդամ պետությունների նախարարությունների և գերատեսչությունների լիազոր ներկայացուցիչների Մոսկվայում հոկտեմբերի 7-8-ն անցկացված խորհրդակցության   մասնակիցները դիտարկել են համաձայնեցված քաղաքականության սկզբունքային հարցերը ավտոմոբիլային, ջրային, օդային և երկաթուղային տրանսպորտի ոլորտներում, ինչպես նաև տրանսպորտային ենթակառուցվածքների, տարանցիկ ուղիների ներուժի իրականացման և գիտական կադրային ապահովման խնդիրները: Կողմերը համաձայնեցրել են փաստաթղթի կառուցվածքը, միջոցառումների ծրագիրն են մշակել, ինչպես նաև ձևավորել են աշխատանքային խումբ, որի առաջին նիստը նախատեսվում է անցկացնել 2015-ի նոյեմբերին: