ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Ռումինիայի Կոնստանցա քաղաքում սեպտեմբերի 19-ին հանդիսավորությամբ նշվել է ՀՀ անկախության 24-րդ տարեդարձը: Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, Ռումինիայում ՀՀ դեսպանության աջակցությամբ և Ռումինիայի Հայոց միության կողմից կազմակերպված միջոցառմանը, ազգային հիմների հնչյուններից հետո, ողջույնի խոսքերով հանդես են եկել Ռումինիայի Հայոց միության մասնաճյուղի նախագահ Խաչիկ Կարապետը, Կոնստանցայի հոգևոր հովիվ Տեր Օշական Խաչատրյանը: Հայաստանի անկախության վերաբերյալ պատմական ակնարկով է ներկայացել գրող Լուիզա Թերզյանը:

Միջոցառման հյուրերից ռումին գրող Մարիուս Կելարուն ներկայացրել է «Անդրկովկասով. Երևանից Լեռնային Ղարաբաղ» աշխատությունը, որում ամփոփված են հեղինակի՝ Հայաստան և Արցախ կատարած ճամփորդություններից ստացած տպավորությունները` հագեցած ազատ Արցախի և Հայաստանի պատմության դրվագներով և լուսանկարներով:

Միջոցառման շրջանակներում տեղի է ունեցել ռումինահայ գրող, դոկտոր Արշալույս Սարգսյան-Գուրաուի «Հարցազրույցներ, դիմանկարներ, վերլուծություններ և հոդվածներ» գրքի շնորհանդեսը, որտեղ ամփոփված են Կոնստանցայի հայ համայնքի ականավոր անձնավորությունների, արվեստի և մշակույթի հայ գործիչների դիմանկարները և նրանց հետ հարցազրույցները, համայնքային հիշարժան միջոցառումների վերաբերյալ հեղինակի հոդվածները:

Հանդիպման բանախոսները և հյուրերը հարցազրուցներ են տվել միջոցառումը լուսաբանող ռումինական լրատվամիջոցներին: