ԱՄՆ-ն պահպանում է ԵԱՀԿ Մինսկի խմբի նկատմամբ հավատը. Պետքարտուղարություն
ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Ադրբեջան այցելած ԱՄՆ-ի պետքարտուղար Ջոն Քերիի Կենտրոնական եւ Հարավային Ասիայի հարցերով օգնական Ռիչարդ Հոգլանդը հուլիսի 23-ին Բաքվում լրագրողներին հայտարարել է, որ ԱՄՆ-ն պահպանում է Լեռնային Ղարաբաղի հակամարտության կարգավորման ԵԱՀԿ Մինսկի խմբի նկատմամբ հավատը:
Ինչպես հաղորդում է «Արմենպրես»-ը` վկայակոչելով «Թրենդ»-ը, Ադրբեջանի ղեկավարության հետ հանդիպումից հետո կազմակերպված մամուլի ասուլիսում ամերիկացի դիվանագետն ասել է. «Կողմերը պետք է այդ հարցը լուծեն փոխադարձ հարգանքի հիմքի վրա»:
Լեռնային Ղարաբաղի հակամարտության ռազմական փուլը ծագել է 1991 թ-ին, երբ ի պատասխան ԼՂ բնակչության ինքնորոշման պահանջի, ադրբեջանական իշխանությունները փորձեցին հարցը լուծել` խորհրդային անվտանգության ուժերի (ԿԳԲ-ի հատուկ ջոկատներ) կողմից անձնագրային ռեժիմի իրականցման քողի տակ էթնիկ զտումներ իրականացնելով եւ լայնածավալ ռազմական գործողություններ սկսելու ճանապարհով, որը բերեց հազարավոր զոհերի եւ զգալի նյութական կորուստների:
1994 թ-ի մայիսի 12-ին ուժի մեջ մտավ զինադադարի մասին ադրբեջանական կողմի խնդրանքով ստորագրված համաձայնագիրը: Ներկայում հիմնախնդրի կարգավորման շուրջ բանակցություններն ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ` 2007 թ-ի նոյեմբերին վերջիններիս կողմից ներկայացված մադրիդյան առաջարկությունների հիման վրա:
Ադրբեջանը մինչ այսօր չի կատարում ՄԱԿ-ի Անվտանգության խորհրդի 1993 թ-ի 4 բանաձեւերը` շարունակելով տարածաշրջանում սպառազինությունների մրցավազքի հրահրումը եւ կոպտորեն խախտելով միջազգային իրավունքի ուժի եւ ուժի սպառնալիքի չկիրառման սկզբունքը:
Հայաստանը համոզված է, որ կարգավորման գործընթացի արդյունավետության բարձրացումն անհնար է առանց բանակցություններին հակամարտության կողմ հանդիսացող Լեռնային Ղարաբաղի Հանրապետության լիիրավ մասնակցության:
Բաժանորդագրվեք մեր ալիքին Telegram-ում