ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Մի քանի օր առաջ կառավարությունում տեղի է ունեցել Ծրագրերի իրականացման գրասենյակների այս տարվա առաջին եռամսյակի գործունեության հաշվետվությունների ներկայացում, որի ընթացքում  ՀՀ վարչապետ Հովիկ Աբրահամյանը զգուշացրել է ԾԻԳ-երի ղեկավարներին՝  զերծ մնալ որևէ տեսակի կոռուպցիոն դրսևորումից:

Կառավարության նիստի սկզբում ՀՀ վարչապետը հայտարարեց, որ տարիներ շարունակ ԾԻԳ-երի միջոցով մեր երկրում միլիարդների հասնող ներդրումներ են իրականցվել, սակայն,  որպես կանոն ավելի շատ խոսվում է կոռուպցիոն սկանդալների, չարշահումների, քան իրականացրած աշխատանքներիր մասին: «Վերջին հանդիպման ժամանակ ես խստագույնս զգուշացրել եմ  ԾԻԳ-երի ղեկավարներին, զերծ մնալու կոռուպցիոն ցանկացած դրսևորումներից: Հակառակ դեպքում ոչ միայն կազատվենք նմանատիպ պաշտոնյաներից , այլ անձամբ հետամուտ կլինեմ՝  օրենքի ամբողջ խստությամբ վերջիններիս պատասխանատվության ենթարկելու հարցում»,- «Արմենպրես»-ի հաղորդմամբ՝ ասաց վարչապետը: 

Նրա խոսքով՝ այս գործընթացներում հրապարակայնության ապահովումն անհրաժեշտություն է, և ի վերջո քաղաքացին, հասարակությունը պետք է իմանա, թե որտեղ և ինչպես են ծախսվում ներգրավվող ֆինանսական միջոցները: