ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ: Կառավարությունը լրացումներ կատարեց «Առևտրի և ծառայությունների մասին» ՀՀ օրենքում և մինչև հունիսի մեկը հետաձգեց որոշ ապրանքների վրա դրոշմապիտակ փակցնելու ժամանակացույցը: 

ՀՀ վարչապետ Հովիկ Աբրահամյանը հիշեցրեց, որ այս տարվա ապրիլի 30-ից պետք է դրոշմապիտակավորվեն դեղերը, վիտամինները, օծանելիքները և այլ ապրանքներ:

«Դեռ աշխատանքներ կան կատարելու, գտնում եմ, որ պետք է մեկ ամիս հետաձգել և ապրիլի 30-ը փոխարինել հունիսի մեկով: Ես կարծում եմ` դա հնարավորություն է ՓՄՁ-ներին, ովքեր ունեն ձեռք բերված ապրանքներ, բայց փաստաթղթեր չունեն: Պետք է հնարավորություն տանք, որպեսզի ՀՀ ֆինանսների նախարարությունը նոր կարգ սահմանի և հանձնարարում եմ նախարարությանն օրենքի փոփոխություն առաջարկել, սահմանել դրոշմապիտակավորման նոր կարգ և այն ընդգրկել արտահերթ նստաշրջան»,- ասաց վարչապետը:

Վարչապետի խոսքով՝ այս ուղղությամբ լուրջ բաց է առկա: Կառավարության ղեկավարն առաջարկեց, որպեսզի հարկային տեսչությունը ձեռնպահ մնա ապրիլի 1-ից այդ խնդիրներին լուծում տալուց: «Եեթե մենք չենք կարգավորել այս խնդիրը, անարդար կլինի, որպեսզի մենք խնդիրներ հարուցենք իրենց համար: Փաստորեն, մարդիկ ապրանք են ձեռք բերել առանց փաստաթղթավորման և օրենքով իրավունք չունեն հարկային ծառայությունից ստանալ դրոշմապիտակներ, որպեսզի դրոշմապիտակավորեն և վաճառեն: Միայն ներկրողներն ու արտադրողներն այդպիսի իրավունք ունեն: Մենք զրկել ենք այդ իրավունքից և որևէ խնդիր չենք լուծել, կարգավորել, որպեսզի մարդիկ կարողանան վաճառել իրենց ապրանքը: Խնդիր է, մայիսի մեկից ինչպե՞ս են նրանք օտարելու ապրանքը»,- ասաց վարչապետը:

Կառավարությունը դրոշմապիտակավորման հետաձգման նախագիծը ճանաչեց հրատապ և կներակացնի ԱԺ: