Սկսվել են «Իմ Հայաստան» համահայկական փառատոնի կազմակերպման աշխատանքները
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: ՀՀ սփյուռքի նախարարությունում տեղի է ունեցել «Իմ Հայաստան» համահայկական փառատոնի աշխատանքային խմբի առաջին խորհրդակցությունը, որին մասնակցում էին ՀՀ սփյուռքի նախարարության աշխատակազմի համահայկական ծրագրերի վարչության պետ Ատոմ Մխիթարյանը, «Հայրենիք-Սփյուռք կենտրոն» ՊՈԱԿ-ի ղեկավար Դավիթ Շահբազյանը, նախարարության աշխատակիցներ: Ինչպես «Արմենպրես»-ին տեղեկացրին ՀՀ սփյուռքի նախարարութունից, «Իմ Հայաստան» համահայկական փառատոնը նախատեսվում է անցկացնել 2012 թ. ապրիլից հոկտեմբերն ընկած ժամանակահատվածում, որի շրջանակներում Հայաստանի համերգային սրահներում կազմակերպվելու են պարային համույթների, երգչախմբերի, անհատ կատարողների ելույթներ:
Փառատոնի նպատակը Հայաստան-Սփյուռք, Սփյուռք-Սփյուռք կապերի և համագործակցության հնարավորությունների ընդլայնմանը, Սփյուռքում հայ մշակույթի պահպանմանն ու զարգացմանը նպաստելն է, Հայրենիքի և Սփյուռքի երիտասարդ ստեղծագործողների միջև մշակութային կապերի խորացմանը, համատեղ ծրագրերի մշակմանը և իրականացմանը սատարելը:
Բաժանորդագրվեք մեր ալիքին Telegram-ում